Cabecera experiencia

As Rías Baixas en curta… e longametraxe

Buscador
Gozar con...
Icono Parella Parella Icono Grupo Grupo Icono Só Icono Familia Familia
Cando ir...
Icono Primavera Primavera Icono Verán Verán
Onde...
Icono Costa Norte Costa Norte Icono Costa Sur Costa Sur
A sétima arte ten un vistoso escaparate nas Rías Baixas, que acollen ao longo do ano festivais de referencia de curtas, longametraxes e documentais. Cans , Pontevedra, Tui, Bueu e Vilagarcía de Arousa convértense durante uns días en capitais cinematográficas. Tanto cineastas emerxentes como de recoñecida traxectoria acoden a estas citas nas que prima a creatividade e a calidade.

Fronte ao luxo e a sofisticación de Cannes, que reúne as grandes estrelas do cinema mundial, a parroquia de Cans, no Porriño, presume do agroglamur do seu afamado festival de curtas de produción galega, que combina o cinema coa diversión e a autenticidade. As e os artistas desfilan en chimpín pola estrada central, que durante o evento se transforma no Cans Bulevar; O Torreiro ―a praza da igrexa― é o centro da festa; e as proxeccións realízanse en adegas, galpóns, baixos e casas vellas. Festivais cinematográficos hai moitos, pero ningún se asemella en estilo, concepto e orixinalidade ao de Cans, no que as e os novos cineastas atopan o escenario ideal para difundir o seu traballo e ao que recoñecidos actores e directores non poden resistirse.

Luis Tosar, Juanma Bajo Ulloa, José Luis Cuerda, Karra Elejalde, Daniel Guzmán, Javier Gutiérrez… Son moitos os cineastas que desfilaron pola "pasarela" de Cans, que segundo a propia organización "quizais non sexa o mellor festival, pero si o máis diferente". O evento, ao que concorren curtas de ficción, non ficción, animación, videoclips e web series, ten lugar a terceira fin de semana de maio, coincidindo co glamuroso certame da Costa Azul francesa. Cans empezou, segundo indican as súas creadoras e creadores, case como unha broma en 2004, cando conseguiu reunir a case medio milleiro de asistentes, e xa se converteu nun referente do panorama audiovisual galego, cun público de máis 13.000 de persoas en cada edición, unha gran cobertura mediática e a parroquia envolta nun ambiente de cinema.

Pero o de Cans non é o único certame cinematográfico de alta calidade nas Rías Baixas, onde a curtametraxe ten un lugar destacado. O decano dos festivais de cinema de Galicia é o Curtas Film Fest, que se iniciou en Vilagarcía de Arousa en 1973. Alí proxéctanse curtas e longametraxes, acode convidada moita xente do mundo do cinema e a televisión e realízanse actividades paralelas, como as xornadas de cómic, que se estrearon na pasada edición, e que acolleron exposicións, sesións de firmas, concursos de videoxogos e xogos de rol.

O calendario cinematográfico das Rías Baixas ten outra cita imprescindible, o Festival Internacional de Curtametraxes de Bueu (FICBUEU), que fomenta desde 2008 a cultura cinematográfica en formato curta. O evento cultural, que este ano se desenvolverá entre o 9 e o 17 de setembro nesta localidade do Morrazo, abre unha xanela ao cinema local e internacional de calidade con decenas de proxeccións. En 2016 a organización recibiu 1.461 curtas de case un centenar de países. Ademais, o FICBUEU colabora con centros educativos e o ano pasado puxo en marcha unha área social con obradoiros e proxeccións para menores hospitalizados, persoas maiores e persoas con discapacidade intelectual.

Pontevedra inaugurou en 2016 outra mostra de calidade, o Festival Internacional Novos Cinemas, que este ano terá lugar entre o 27 de xuño e o 2 de xullo. O certame está aberto a cineastas emerxentes de todo o mundo e premia o traballo das directoras e directores noveis. Poden concorrer óperas primas ou segundas producións, sempre cunha duración de máis de sesenta minutos. Durante o festival realízanse encontros do público con cineastas e equipos de producións que se presentan na sección oficial. Ademais, a programación compleméntase con iniciativas como Resonancias, que elixe un dos títulos que compiten á proposta da crítica cinematográfica.

O Play-Doc de Tui é a cita de referencia en cinema documental nas Rías Baixas. O certame, que este ano se realizará entre o 22 e o 26 de marzo, destaca pola gran calidade da súa programación, enriquecida na nova edición cunha colaboración especial da sala Metrograph, icona do cinema independente neoiorquino. O Play-Doc recibiu máis de 700 traballos procedentes de 66 países este ano e a programación compleméntase con música en directo, cursos, seminarios e obradoiros. Nesta nova convocatoria ofrecerán concertos Joan as Police Woman & Benjamin Lazar Davis, Star Rover e The Dirty Coal Train.

As Rías Baixas ofrecen sesión cinematográfica continua cunha ampla panorámica. A sétima arte cóidase, difúndese e prémiase, en curto e longo formato.

Gozar con...
Parella Grupo Familia
Cando ir...
Primavera Verán
Onde...
Costa Norte    Costa Sur