Cabecera experiencia

Festa do Choco, un festín para o padal

Buscador
Gozar con...
Icono Parella Parella Icono Grupo Grupo Icono Só Icono Familia Familia
Cando ir...
Icono Primavera Primavera
Onde...
Icono Costa Sur Costa Sur

En Redondela péscase choco desde hai máis de tres séculos. Este molusco cefalópodo é, en toda a provincia de Pontevedra, un prato que identifica este concello das Rías Baixas, ata o punto de que as redondelás e redondeláns teñen en "choqueira" e "choqueiro" un xentilicio non oficial pero moi arraigado no saber popular.

Cada primeira quincena do mes de maio a localidade vístese de longo para homenaxear como merece o rei dos seus mares e tamén dos seus fogóns. Na vila, un toldo convértese no epicentro da degustación popular mentres os establecementos hostaleiros se afanan en sorprender coas súas receitas.

Conségueno, ano tras ano. Así o testemuña a afluencia de visitantes, que en cada edición se multiplican e que se contan xa por miles. Se o choco é, por suposto, protagonista destas elaboracións, os ingredientes que o acompañan varían tanto coma a imaxinación de cada chef. Con arroz, guisado, na súa tinta, con patacas, con ameixas, en empanada, en feixoada ou con grelos son só algúns dos pratos que tentan a calquera comensal. Ademais de propoñer un festín para o padal a festa convértese nunha proba de orixinalidade entre establecementos hostaleiros, que compiten por conseguir distincións para as súas propostas, creativas ou tradicionais.

En 2017 a Festa do Choco fai 31 anos. Moito máis ca unha celebración, este evento é unha manifestación da importancia do choco na idiosincrasia redondelá. Os chocos críanse en augas do concello e captúranse de modo artesanal na enseada de San Simón –que é onde máis abundan– usando nasas, cunha técnica tradicional que foi pasando de xeración en xeración.

Ademais da oferta gastronómica, hai moitos motivos para visitar esta vila: a música soa, as rúas énchense de propostas e o ambiente lúdico imprégnao todo desde a mañá ata a noite, cando a verbena engade ritmo e diversión.

E ademais de gozar do sabor máis redondelán, esta localidade das Rías Baixas permite coñecer outros tesouros destas terras: a illa de San Simón, o Camiño de Santiago e paisaxes, praias e rutas sempre fascinantes. En materia culinaria, aínda que o choco é o prato estrela, ao longo do ano exáltanse ademais outros produtos coma o mexillón ou a mazá.

Finalmente, de entre todas as festividades destacan as do Corpus Christi, ligadas á Festa da Coca, nas que se exhiben unhas alfombras florais que son auténticas obras de arte e se bailan danzas propias desta zona.
Gozar con...
Parella Grupo Familia
Cando ir...
Primavera
Onde...
Costa Sur   
Recursos da experiencia
Recursos da experiencia
Recursos próximos
Recursos próximos