Cabecera experiencia

Lérez honra ao santo máis milagroso

Buscador
Gozar con...
Icono Parella Parella Icono Grupo Grupo Icono Só Icono Familia Familia
Cando ir...
Icono Verán Verán
Onde...
Icono Costa Sur Costa Sur

Dous son os días marcados no calendario en Lérez, nas proximidades de Pontevedra: o 21 de marzo e o 11 de xullo. Nestas xornadas a localidade das Rías Baixas honra o que é considerado un dos santos máis milagrosos e venerados, san Bieito. Coñecida como san Benitiño de Lérez, esta é unha romaría na que os fieis chegan por centos.

Esta celebración conta desde 1998 coa declaración de Interese Turístico de Galicia. Nela destacan especialmente dous rituais: a unción do dedo na lámpada de aceite, bendicido e queimado, que se sitúa nas proximidades do santo e ao que se lle atribúen propiedades milagrosas, e a tradición de pasar por baixo do altar. Aínda que se descoñece a orixe deste costume, é un hábito presente en numerosas procesións das Rías Baixas.

É tamén frecuente ofrecerlle ao santo, buscando a súa intercesión, distintas candeas e figuras que representan aquelas partes do corpo que se pretende sandar ou protexer. Do mesmo xeito, algúns fieis optan por pasar pola imaxe de san Bieito un pano co que despois fregarán o corpo.

Nunha tradición repartida por toda a provincia, destaca, por exemplo, a romaría de san Bieito de Pardesoa, en Forcarei. Ademais dos oficios relixiosos propios do templo, sobresae a popular procesión de Lérez, na que se dan cita numerosos devotos. Orixinario da Alta Idade Media, o culto a san Bieito propagouse a través da Orde do Císter. Así, é coñecida a súa capacidade para a curación de todo tipo de afeccións cutáneas, en especial as verrugas.

Ademais da propia devoción, como en toda romaría das Rías Baixas, na do Lérez está tamén moi presente a gastronomía, con distintas propostas culinarias propias da zona. Familias e amigos adoitan compartir o momento da comida na contorna do mosteiro de San Bieito.

Cabe sinalar que este antigo mosteiro beneditino presenta elementos barrocos e neoclásicos, pois pasou por distintas reformas e modificacións. Do mesmo xeito, a súa igrexa é neoclásica con fachada barroca do século XVIII e nela pódese observar a imaxe de san Bieito.

Un santo moi venerado na provincia

Aínda que a festa de San Bieito de Lérez é a máis afamada das Rías Baixas, noutros municipios da provincia tamén se lle rende culto cunha gran tradición. As celebracións atraen a centos de fieis chegados de distintos puntos das súas comarcas. Destacan san Bieito de Pardesoa (Forcarei), Domaio (Moaña), O Mosteiro (Meis), Lores (Meaño), Cambados e Xaxán (Lalín).
Gozar con...
Parella Grupo Familia
Cando ir...
Verán
Onde...
Costa Sur