Cabecera experiencia

Paisaxes de película nas Rías Baixas: os escenarios de "O final do Camiño"

Buscador
Gozar con...
Icono Parella Parella Icono Grupo Grupo Icono Só Icono Familia Familia
Cando ir...
Icono Outono Outono Icono Inverno Inverno Icono Primavera Primavera Icono Verán Verán
Onde...
Icono Interior Norte Interior Norte
Percorre as paraxes onde se rodou a serie de TVE e TVG, desde os mosteiros de San Lourenzo de Carboeiro e Santa María de Aciveiro ata as Brañas de Xestoso, a fervenza de Escuadro e a praia fluvial de Cira

As paisaxes de Silleda evocan na serie O final do Camiño a Compostela medieval, o escenario da batalla de Uclés (Cuenca) e mesmo o val do Rif marroquí. A Feira Internacional de Galicia, na localidade dezá, serviu de estudio tamén para evocar o Toledo e a Sevilla do século XII. E o mosteiro de Santa María de Aciveiro de Forcarei transfórmase na pequena pantalla no palacio de Châlons en Francia, ademais de acoller o concilio de Husillos (Palencia), no que foi deposto o bispo de Compostela Diego Peláez polo seu apoio ao rei de Galicia fronte a Afonso VI de León.

A provincia de Pontevedra é, xunto co elenco de actores e actrices, a protagonista de O final do Camiño de TVE e TVG, que narra as aventuras de tres irmáns e a súa relación con diversos personaxes históricos. Como pano de fondo da trama está a construción da catedral de Santiago, a finais do século XI. O reparto inclúe coñecidos intérpretes coma Javier Rey, Cristina Castaño, Guillermo Barrientos ou Begoña Maestre, e o destino Rías Baixas é o marco da historia, definida por Maestre como unha sorte de "Xogo de tronos, con amor e aventura".

Os lugares da rodaxe

O equipo de rodaxe instalouse en diversas localizacións de Silleda, Lalín, A Estrada, Vila de Cruces e Forcarei. A Feira Internacional de Galicia viaxou no tempo dez séculos para converterse na Compostela dos anos nos que se construíu a catedral, co seu mercado, ferreiros e personaxes vestidos de época.

O recinto, de 428.000 metros cadrados, con sete pavillóns, sala de conferencias e auditorio entre as súas instalacións, serviu tamén de lugar de aprendizaxe no manexo da espada para os actores e actrices e para o adestramento a cabalo. Ademais instaláronse alí decorados interiores que evocaban o Toledo medieval baixo dominio musulmán e a Sevilla en tempos de Al-Andalus.

O sepulcro de Santiago Apóstolo situouse na ficción na igrexa de San Pedro de Ansemil (Silleda), con orixe nos séculos IX e X, que foi mosteiro de monxas beneditinas. O templo conta con dúas capelas, unha románica de planta basilical con tres naves e outra gótica, dedicada a santa Ana e coñecida como Capela Señorial dos Deza, e alberga en realidade o sarcófago do cabaleiro Diego Gómez de Deza, datado en 1341.

O antigo mosteiro é contemporáneo de San Lourenzo de Carboeiro (Silleda), que se transforma na serie na catedral de Santiago. Este cenobio de Deza, de estilo románico de transición a gótico, representa un dos exemplos máis característicos da arte medieval galega, e de feito está influído polo estilo que empregou o mestre Mateo no monumental templo compostelán no que conclúe a peregrinación xacobea. A orixe do convento de Silleda remóntase ao ano 936, baixo a protección real de Ramiro I de León. A igrexa, con planta de cruz latina e catro naves, data do século XII e é unha das máis vangardistas do seu período. A fachada, cuxa temática son os anciáns da Apocalipse, loce 23 esculturas.

O mosteiro de Carboeiro xa serviu de estudio noutras ocasións. En 1965 rodáronse alí escenas da película Cotolay; en 1973, Flor de Santidad de Valle-Inclán; en 1995, La ley de la frontera; e, en 2006, Quart, baseada esta última na novela de Arturo Pérez-Reverte La piel del tambor. Ademais, Enrique Iglesias gravou alí o videoclip da canción Noche y día, que recibiu máis de 123 millóns de visitas en YouTube .

Outro mosteiro, o de Santa María de Aciveiro (Forcarei), trasládanos na ficción ao palacio de Châlons e ao concilio da Igrexa católica dos reinos de León e Castela, que tivo lugar en Husillos (Palencia) en 1088. O edificio é en realidade un mosteiro medieval cisterciense, fundado en 1135 baixo o reinado de Afonso VII de León, que vertebrou a vida económica e social de Terra de Montes ata a exclaustración pola desamortización de 1842. Está clasificado como Monumento Histórico-Artístico.

As Brañas de Xestoso, tamén en Silleda (en confluencia coa Estrada e Forcarei), son o escenario en O final do Camiño da batalla de Uclés, que enfrontou en 1108 as tropas cristiás de Afonso VI cos almorábides de Ali Ibn Yusuf e da que o exército do rei de León sairía derrotado.

As Brañas abarcan un espazo natural de 1.077 hectáreas de enorme valor, integrado na rede Natura 2000 e clasificado como Lugar de Importancia Comunitaria e Zona de Especial Protección para as Aves. A enorme superficie é un cordal de montes con suaves pendentes e chairas entre as cuncas dos ríos Ulla e Umia. Entre os seus atractivos destacan a ermida de San Sebastián e a Lagoa Sacra.

Das Brañas forma parte a fervenza do río Férveda en Escuadro (Silleda), tamén escenario de O final do Camiño, neste caso evocando os arredores de Compostela. A fermosa fervenza salva unha altura de 17 metros. Nas fragas da contorna hai unha ampla variedade arbórea con acivros, carballos, castiñeiros, salgueiros, alisos e freixos.

Silleda tamén cambia de continente na ficción televisiva para transformarse no Rif (Marrocos), neste caso a través da canteira de Rosende. No mesmo concello a praia fluvial de Cira traslada o espectador á Compostela do século I, cando foi achado o corpo do apóstolo Santiago. O espazo natural atópase na confluencia dos ríos Ulla e Deza e está clasificado como Lugar de Importancia Comunitaria. Ademais de destacar pola súa beleza é ideal para bañarse no verán e conta con servizos coma mesas á sombra, parque biosaudable e aparcadoiro.

Outra das paisaxes que se transforma na serie é o pazo de Donfreán (Lalín), que evoca o poboado de Catoira e o propio Camiño de Santiago. O pazo é unha casa señorial situada na parroquia de Catasós, construída en estilo barroco a mediados do século XVIII. O edificio, con planta en forma de U, componse de tres corpos unidos. A parroquia de Donfreán era unha antiga propiedade da familia dos Taboada, en 1625 pasou aos Gómez Oxea de Albán e posteriormente, por enfrontamentos familiares, aos Montenegro.

A parroquia de Saídres (en Silleda) simula os bosques de Compostela na produción audiovisual, mentres que Patanín (Santeles, A Estrada) tamén se traslada ao século XII para mostrarnos os camiños que levan a Compostela.

A trama e os personaxes de O final do Camiño son ficción, pero as paisaxes son moi reais e están nas Rías Baixas. O mellor para coñecelas é visitalas. Hai moito por ver.

Gozar con...
Parella Grupo Familia
Cando ir...
Outono Inverno Primavera Verán
Onde...
Interior Norte