Tres carreiros en Soutomaior : camelias, viñedos e bosque

Buscador
Paraxe de castelo, escenario de loitas e espazo onde reinaron as armas, Soutomaior elévase con brío no val do río Verdugo. Podería parecer que o fai con forza, coa resistencia propia dunha fortaleza medieval que hoxe loce tamén palaciana. E, con todo, neste enclave é a delicadeza a que gaña todas as batallas. A flor de Oriente proporciona sutileza. Os viñedos, personalidade. E o bosque, frondosidade. Todos a un tempo configuran Soutomaior, onde a arquitectura e a contorna natural forman unha unión indisoluble.

Poñer os pés na contorna do castelo de Soutomaior, no concello pontevedrés do mesmo nome, é como iniciar unha viaxe no tempo. Ao dos xograres, os oficios tradicionais ou as batallas medievais. Este espazo situado no val do río Verdugo, próximo ao mar pero escondido del, teno todo: unha ponte levadiza, un recinto dobremente amurallado e ata un patio de armas, que nos transportan, de inmediato, ao escenario de calquera relato medieval que teñamos en mente. Nos primeiros metros da ladeira sobre a que se asenta contemplamos a panorámica que esta fortaleza se encarga de encher. E inícianse as primeiras escenas.

Aínda que non existe confirmación sobre a orixe deste castelo, hoxe en perfecto estado de conservación, considérase moi probable que os seus inicios daten do século XII, e que se ligase máis tarde a Pedro Álvarez de Sotomayor, coñecido como Pedro Madruga. O máis célebre dos Sotomayor impulsou a renovación do castelo, que pasou de despuntar en enfrontamentos bélicos a adquirir anos máis tarde un carácter residencial. Varias disputas levaron a que, xa no século XVIII, Benito Fernando Correa tomase posesión da construción. Os marqueses de Vega de Armijo fixeron posteriormente dela a súa residencia de verán. E neste proceso de transformación nun acolledor fogar naceu tamén un dos xardíns máis espectaculares de toda a provincia pontevedresa. A Deputación de Pontevedra adquiriuno en 1982.

Pero para coñecer en profundidade este fermoso e histórico castelo e a súa contorna que, con 25 hectáreas, está considerada o xardín botánico máis importante de Galicia, hai tres opcións. Convertidos en rutas, estes tres itinerarios discorren polo seu xardín de camelias, polos viñedos ou polo bosque que o rodea. Imos descubrilos un por un:

  • As camelias. A flor de Oriente, que inunda de cor a paisaxe, é a protagonista indiscutible do xardín. Xunto a castiñeiros de máis de 800 anos de antigüidade, as camelias cóntanse por ducias. Hainas de ata 25 variedades distintas, de diferentes cores, tamaños e formas, que nos acompañan desde a propia escalinata de acceso ao parque. Ao iniciar de novo o camiño cara ao castelo albíscanse os exemplares centenarios que, no seu día, tiveron o privilexio de albergar as primeiras plantas de camelia de Galicia. A súa veteranía engádelle atractivo a un xardín enmarcado na Ruta da Camelia e recoñecido como Xardín de Excelencia Internacional desde 2012. E, en materia de experiencia, hai unha clara vencedora: a Camellia japonica do século XIX, a máis lonxeva de todo o parque. En total, máis de 200 camelias arrolan o camiñante, que tras deixar atrás unha entrada bordeada de camelias descobre, entre distintos tons, reticulatas ou longicarpas.
  • Os viñedos. O caldo da vide é parte importante da idiosincrasia das Rías Baixas e, neste caso, a zona de Soutomaior é recoñecida pola alta calidade dos seus albariños. Ao internarse nos viñedos do castelo descóbrense espazos moi distintos: un central, que mostra unha planificación case propia dun xardín, e outro máis escarpado, ao fondo da propiedade.
  • O bosque. Un solo menos fértil e pouco profundo convertido en alfombra natural: así é o terreo forestal de Soutomaior. Extenso e montañoso no seu inicio, este itinerario mestura camelias e especies forestais de tal maneira que do xardín á fraga o tránsito é moi suave. A capela de San Caetano, un pequeno regato e fermosas vistas acompañan o camiñante, que recibe a sombra e o acubillo de todo tipo de especies: arbustos ornamentais, castiñeiros, carballos, piñeiros, eucaliptos, liquidámbares, érbedos ou loureiros rivalizan entre si, e todos parecen gañar.

Así é Soutomaior. Unha unión indisoluble entre arquitectura e contorna natural. Entre parque e castelo hoxe convertido en palacio e no que, como tal, se suceden distintas salas nobres ou o capricho neogótico denominado a Galería das Damas.

Visitas e sendas (pdf)

Gozar con...
Parella Grupo Familia
Cando ir...
Outono Inverno Primavera Verán
Onde...
Interior Sur   
Recursos da experiencia
Recursos da experiencia
Recursos próximos
Recursos próximos