Os ollos do Atlántico

Buscador
Os faros foron sempre gardiáns de océanos e mares. Construcións milenarias, son na costa o que os sinais na estrada, un aviso para frear ou continuar, unha invitación a dirixirte a un e a todos e a fantasiar coa idea da vida ermitá da persoa que traballa no faro.

A costa das Rías Baixas é moi famosa polos seus faros. Moitos deles gardan lendas sobre naufraxios cargadas de misticismo.

Unha costa como a de Rías Baixas, de perfil suave pero de entradas sinuosas, necesitou de faros para axudar a navegantes nas súas travesías e nos seus achegamentos a localidades costeiras. Actualmente a maioría están automatizados pero houbo un tempo no que a figura da fareira ou fareiro era indispensable para o seu funcionamento; rodeados dun halo de misterio e romanticismo, mulleres e homes consagrados á protección das costas cunha vida case ermitá.

A ruta na que podes imaxinar como sería esa vida levarache de terra firme ás illas do Parque Nacional Marítimo-Terrestre das Illas Atlánticas.

Algunhas destas xoias do Atlántico son:

O faro de Punta Cabalo, na Illa de Arousa, que ofrece vistas sobre a ría de Arousa, as súas bateas e a próxima costa de Barbanza. Reconvertido en restaurante, continúa funcionando como guía na noite, o que engadirá o toque máxico a unha experiencia gastronómica xa de seu especial.

O faro de Ons que mantén a figura da fareira ou fareiro, unha das últimas de Galicia. Ao atractivo de acampar na principal illa do arquipélago de Ons, engádese o visitar un faro peculiar por edificarse sobre a base dun xa existente, e por ser dos últimos en pasarse ao uso da enerxía fotovoltaica. A visita ao monte Cucarno será obrigatoria se visitas Ons.

Enfronte e en terra firme, o faro de Cabo Home preside a Costa da Soavela, na península do Morrazo. Acompañar a visita deste faro cunha xornada de praia en Melide será case inevitable. Esta costa non conta unicamente con este extremo. Outra sinalización é a do faro de Punta Subrido e o de Punta Robaleira, entre os que poderás facer unha ruta de sendeirismo bordeando os cantís.

A pouco máis de 2,5 quilómetros, tan preto que che parecerá que as podes alcanzar coas mans, están as illas Cíes. Na chamada Illa do Faro atópase o edificio do faro de Monteagudo, que pon fin a unha das rutas de sendeirismo máis coñecidas polas persoas que visitan estas illas ou por quen soña con ir algún día. O ascenso cheo de curvas merecerá a pena: 178 metros de altura, o horizonte a un lado, a ría de Vigo ao outro e a visión do arquipélago, das súas praias e da súa fauna e flora case desde o alto.

A cidade de Vigo conta cun miradoiro sobre a súa ría indispensable se buscas ese atardecer que garantirá as mellores fotos do teu álbum de vacacións: o monte da Guía. O promontorio no que se sitúa forma unha punta cara ao mar, coñecida como Punta da Guía, co seu correspondente faro. Orixinariamente construído no 1844, o actual data de 1914 e serviu para guiar as embarcacións que navegaban pola enseada de San Simón, sendo o seu lazareto naquela época a razón do importante aumento do tráfico marítimo. Hoxe en día marca o inicio da senda litoral do monte da Guía.

O máis setentrional desta ruta, o faro de Cabo Silleiro, levarate máis aló de Baiona e, temporalmente, ao século XIX, momento da súa construción. Pero este, demasiado preto das arremetidas do mar, foi abandonado e en 1924 elixiuse un punto máis alto na montaña para o novo. A súa función vólvese indispensable para a navegación da costa sur de Rías Baixas grazas ao longo alcance da súa lámpada.

Recursos da experiencia
Recursos da experiencia
Recursos próximos
Recursos próximos