Mergúllate nos bosques de interior

Buscador
Gozar con...
Parella Grupo Familia
Cando ir...
Outono Primavera Verán
Onde...
Interior Norte   
O interior de Rías Baixas conserva espazos naturais no seu estado máis puro con aldeas tradicionais que farán as delicias de calquera visitante. Rutas nas que te deberás introducir sen reloxo e sen hora de regreso.

O municipio de Vila de Cruces é coñecido principalmente pola súa Festa do Galo de Curral. Esta forma parte da Rede Europea de Patrimonio Gastronómico debido á utilización de produtos locais e á promoción da cociña tradicional, coa característica de que se empregan galos criados ao aire libre e alimentados de maneira totalmente natural.

Para non perder de vista esa sensación de liberdade, a visita pode completarse coñecendo varios lugares no medio da natureza. O encoro de Portodemouros, na conca do río Ulla, ten unha capacidade de case 300 hm3 e un tamaño tal que baña catro concellos. Alí mesmo podes achegarte ás seis illas de Gres, uns illotes formados polo río Ulla, unidos por pasarelas, polos que as persoas visitantes acceden a unha zona de descanso xunto ao río.

O lugar dos Sobreirais do Arnego tamén ten que ver co río e co bosque. O Arnego, afluente do Ulla, ten un dos bosques mixtos mellor conservados, formado por carballos e sobreiras, presentes só en vales fluviais ben abrigados. O val de Carmoega, no municipio de Agolada, cun sendeiro de muíños, é un lugar idóneo onde se pode practicar a pesca. Ademais, conta cunha área recreativa.

En Silleda agárdate a maxia do románico escondida nunha fraga galega; desde a fervenza do río Toxa poderás gozar do percorrido polo sendeiro que leva ao mosteiro de Carboeiro. Debido á súa importancia natural este espazo forma parte do Lugar de Importancia Comunitaria Sistema Fluvial Ulla-Deza. Durante seis quilómetros descéndese ao pé da fervenza, cruzando unha ponte de ferro pola que se chega á localidade de Merza. Deixando atrás a praia fluvial da Carixa e o lugar da Portela, chegarás a unha calzada medieval e á ponte romana coñecida como ponte do demo. Unha vez en San Lourenzo de Carboeiro poderás deleitarte cunha das mellores mostras de arte románica oxival.

Entre Tabeirós e Deza existen unhas marismas cheas de turbeiras: as Brañas de Xestoso, área protexida Rede Natura, nas que destaca a lagoa sacra, un prado cheo de zonas húmidas que secan no verán, onde viven réptiles, anfibios, falcóns, aguias, raposos ou lobos. O máis curioso deste enclave é a lenda que di que a lagoa foi amurallada tras unha batalla na que numerosos mortos foron guindados á auga, procedendo á instalación dun muro para evitar que fosen profanados.

A vida e os coñecementos das aldeas galegas é algo que se trata de protexer como o máis prezado tesouro, pois cada vez son menos os lugares onde se manteñen as tradicións e certos oficios que están a desaparecer por falta de xeracións que os substitúan. En Doade, Lalín, existe un lugar chamado A Casa do Patrón, onde se trata de revalorizar e dar a coñecer todo este valor etnográfico e o acervo popular dunha rexión. En dous mil metros cadrados e con máis de catro mil pezas este museo fai un repaso tanto de como eran as vivendas antigamente coma do día a día nunha aldea, desde a escola das nenas e nenos ata os labores agrícolas, oleiros, de carpintería, de cantería ou de cestería entre outras.

Gozar con...
Parella Grupo Familia
Cando ir...
Outono Primavera Verán
Onde...
Interior Norte   
Recursos da experiencia
Recursos da experiencia
Recursos próximos
Recursos próximos