Dozón, aire fresco no Camiño de Inverno

Buscador
Gozar con...
Parella Grupo Familia
Onde...
Costa Sur   

As peregrinas e peregrinos que elixan o Camiño de Inverno para facer a ruta xacobea a Santiago de Compostela cruzarán na súa andaina o concello de Dozón, rico en monumentos artísticos, na comarca de Deza. Por alí entrarán na provincia de Pontevedra a través dun itinerario que xa empregaban os romanos, unha vía milenaria que se converteu nunha alternativa máis accesible para as e os camiñantes que se dirixían á cidade do Apóstolo desde Ponferrada e a través da cunca do río Sil para salvar os duros cumios nevados do Cebreiro durante o inverno.

Dozón, situado entre as serras do Faro e do Testeiro, é o concello máis pequeno de Deza pero conta con 54 núcleos de poboación nas súas oito parroquias, que son: Bidueiros, O Castro, Dozón, As Maceiras, Saa, Sanguiñedo, O Sisto e Vilarello. Quen na súa peregrinaxe pare na vila poderá visitar a igrexa de San Pedro de Vilanova, unha xoia do Románico do século XII pero con elementos do Barroco. O rei Fernando II concedeulle ao antigo mosteiro, do que actualmente só se conserva o templo, privilexio de couto, asinado por Afonso X e Sancho IV no ano 1286.

Outro monumento relixioso de gran beleza é a igrexa de Santa María de Dozón, de planta rectangular. A súa fachada ten unha portada con arquivoltas apoiadas sobre columnas e falsos contrastes nas esquinas. Os seus muros son de cantería granítica disposta en fiadas horizontais.

Antigos pendellos

Os antigos pendellos, onde tiñan lugar as feiras e se almacenaban as mercadorías, son outro dos reclamos da localidade dezá. Neles as e os camiñantes poderán descansar antes de seguir o seu camiño rumbo á praza do Obradoiro e á catedral de Santiago de Compostela.

Gozar con...
Parella Grupo Familia
Onde...
Costa Sur