Nadal en As Rías Baixas: Frozen II chega a Vigo cunha rúa temática e a preestrea da película en España
O Nadal de Vigo chega repleto de sorpresas. Á espectacular iluminación, a neve artificial e a nora xigante súmase agora a maxia de Disney. A compañía elixiu a cidade para presentar o día 20 de novembro a preestrea en España da súa película Frozen II. O acordo co Concello inclúe a decoración da rúa do Progreso con figuras e luces ambientadas na longametraxe de animación con máis recadación da historia; unha “rúa Frozen” que fará gozar a nenas e nenos da maxia da fábrica dos soños e atraerá a decenas de miles de familias a Vigo.
Elsa, a princesa do xeo, a súa irmá Anna e o resto de divertidos personaxes da película saltarán á rúa este Nadal e farán realidade os soños das nenas e nenos da provincia de Pontevedra. Atraccións e bonecos inspirados na película farán aínda máis especial este mes e medio de festas na urbe olívica.
Vigo: destino ideal no Nadal
“Disney considera que a iluminación de Nadal gañou un gran recoñecemento pola súa espectacularidade, o que a converte nun destino ideal. Por iso elixe Vigo para presentar Frozen II”, destacou o alcalde, Abel Caballero, ao anunciar o acordo de colaboración con The Walt Disney Company Iberia.
Á preestrea nos cines de Plaza Elíptica acódese con invitacións, e a partir do día 22 a película poderá verse na carteleira. Promete ser un dos grades éxitos do Nadal de 2019.
A nova “rúa Frozen” deste Nadal vivirá o seu particular acendido o mesmo día que a iluminación de Vigo. A festa do Concello empezará o sábado 23 de novembro ás 20:00 horas na Porta do Sol e as luces e atraccións de Disney no Progreso farano ás 21:30 horas. Promete ser unha xornada chea de sorpresas e diversión para gozar en familia.
