Desfile de golfiños, baleas e crías de quenlla nas Rías Baixas
A riqueza mariña das Rías Baixas explica que cada vez sexa máis común a presenza dalgunhas especies en busca de alimento, como golfiños e outros cetáceos. Ademais, non só visitan o noso litoral: no caso dos golfiños tamén se reproducen nas nosas augas.
Crías doutras especies mariñas máis sorprendentes nas augas da provincia de Pontevedra, como os tiburóns azuis, tamén se converten durante a tempada estival en turistas acuáticos das nosas marabillosas rías, unha paraxe ideal para a observación de especies mariñas.
Os golfiños reprodúcense e divírtense nas Rías Baixas
O equipo do BDRI (Bottlenose Dolphin Research Institute), que centra os seus estudos nos golfiños mulares, rexistrou en xullo o nacemento dunha cría desta especie nas Rías Baixas, concretamente en augas da Ría de Arousa . Este acontecemento puido ser fotografado grazas ao seguimento que realizou este instituto que coñecía perfectamente o estado de xestación dunha golfiño mular, un proceso que dura uns doce meses. A particularidade deste fenómeno da natureza está en que esta especie ten só unha cría por parto e dá a luz unha vez cada tres ou catro anos.
Os golfiños aliméntanse, reprodúcense e gozan das nosas augas, pero tamén teñen tempo para a diversión, realizando saltos e acrobacias realmente espectaculares. Segundo este instituto, que estuda a actividade dos golfiños mulares, algunhas das causas do dinamismo que demostran estes mamíferos poderían ser a abundancia de alimento, a procura dunha mellor perspectiva do mar ou como mostra dun estado de felicidade ao compartir esta aventura con outros da súa especie.
Ademais, o BDRI documentou a presenza a finais de xullo dun exemplar da especie máis grande do planeta, a balea azul, nas costas galegas. O cetáceo que surcaba as costas galegas tratábase dun exemplar novo duns 20 metros, xa que esta especie, pode chegar a medir 30 metros.
Un descubrimento único nas nosas rías
Despois do avistamento deste cetáceo a finais de xullo, o pasado 11 de agosto, produciuse unha observación máis queinesperada. Durante unha expedición realizada polo barco “Chasula”, que parte desde O Grove con frecuencia realizando un proxecto para tratar de descubrir aves peláxicas e mamíferos mariños, puideron observar como dúas baleas azuis sucaban as augas da Ría de Arousa. Este acontecemento non ocorría desde hai décadas, xa que estes cetáceos adoitan viaxar en solitario.
O tiburón azul, un dos escualos máis elegantes do océano, volve ás Rías Baixas
A proliferación estival de crías de tiburóns azuis, coñecidos tamén como quenllas, volven converter ás Rías Baixas nun magnífico escenario da natureza. Esta elegante especie de corpo alongado e estilizado, con aletas pectorais finas e alongadas, pode chegar a nadar distancias migratorias de ata 5.000 quilómetros.
O CEMMA (Coordinadora para o Estudo dos Mamíferos Mariños) rexistrou desde finais do mes de xullo uns 25 exemplares de ata 80 centímetros de longo. O domingo 5 de agosto produciuse o avistamento na Ría de Pontevedra, fronte á costa de Bueu, de dous exemplares de quenlla, unha especie que tamén frecuentou outros puntos das Rías Baixas como a praia de Rodas nas illas Cíes ou a contorna do espigón de Baiona.
Entre as posibles hipóteses sobre a presenza destes escualos no litoral galego, as e os expertos descartan a persecución de alimento destes depredadores, e apuntan cara a outras teorías como o aumento da temperatura da auga ou algúns cambios nas condicións do océano. Hai que lembrar que a colaboración cidadá é fundamental e que se se produce algún avistamento hai que chamar ao 112, para que poidan informar ás e aos investigadores.
