O sector turístico das Rías Baixas busca ampliar fronteiras
A xornada de “O Reto da Internacionalización para o Sector Turístico”, celebrada o mércores 19 de decembro, e organizada pola Deputación de Pontevedra e o Clúster de Turismo de Galicia, reuniu a un centenar de axentes turísticos. O encontro permitiu ás e aos asistentes coñecer en profundidade os cambios que está a experimentar na actualidade a internacionalización e a xestión nos diferentes destinos turísticos ou os retos que supón a introdución das novas tecnoloxías neste ámbito da man de persoas profesionais tanto de institucións públicas como privadas.
Na inauguración do evento, a cargo da presidenta provincial Carmela Silva, e o presidente do Clúster de Turismo de Galicia, Cesáreo González, este último agradeceulle á presidenta a colaboración entre as dúas institucións destacando o frutífero workshop celebrado recentemente en Barcelona, ao que acudiron trinta empresas da provincia de Pontevedra. "O que sucedeu en Barcelona foi un éxito rotundo e se eu estaba xa convencida de que traballar co sector privado era imprescindible, en Barcelona vin en primeira persoa que se traballamos conxuntamente o éxito está garantido" engadiu Carmela Silva.
Silva resaltou a importancia de traballar en conxunto, das colaboracións entre o sector público e privado, e propuxo ao Clúster de Turismo de Galicia organizar unha reunión coas catro deputacións galegas e a Administración autonómica en xaneiro para sumar sinerxias e impulsar estratexias de promoción turística conxuntas.
Finalmente, a presidenta provincial destacou no seu discurso a potencialidade do destino turístico da provincia de Pontevedra: "Cando veñen ás Rías Baixas as e os turistas sorpréndense por todos os atractivos que se atopan. Temos unha costa espectacular, un interior máxico, xacementos arqueolóxicos, unha gastronomía e uns viños únicos, e unha cultura marabillosa”.
Galicia, o primeiro destino español ao que viaxan as e os portugueses
A conselleira de Turismo en Lisboa, Natalia Briales, foi a encargada de inaugurar os simposios cun relatorio sobre a internacionalización turística do mercado luso, que comezou cunha introdución sobre a súa evolución en cifras. Segundo os datos de Briales, Galicia sitúase como o primeiro destino en España que visitan as e os portugueses, seguido doutras comunidades como Andalucía, Madrid ou Castela e León. Máis dun 35 % de turistas de
Portugal e o turismo de emocións
En canto ás procuras realizadas polas e polos portugueses durante este ano 2018 na web de Turismo de España, para a que se analizaron máis de 260.000 consultas, a Festa do Marisco do Grove aparece no Top 5 ocupando o cuarto lugar. Sanxenxo, o Corpus Christi de Ponteareas , o castro de Santa Trega na Guarda, a Romaría Viquinga de Catoira, Pontevedra, Cambados ou Tui, son ademais outros dos atractivos turísticos das Rías Baixas máis buscados. Finalmente Briales destacou certas similitudes deste destino co norte de Portugal como na natureza ou o termalismo.
A continuación, o conselleiro de Turismo en Berlín, Arturo Ortiz falou da internacionalización turística no mercado alemán, que a pesar de que na súa maioría seguen buscando o sol e a costa do Mediterráneo, existe un perfil de turista cosmopolita que busca unha experiencia máis emocional, e que é exactamente o que ofrece o destino Rías Baixas.
Estratexias de internacionalización
En primeiro lugar, tivo a palabra o director Xeral de NEXT International Business School, José Lominchar, que iniciou o seu discurso falando da incidencia das novas tecnoloxías na actualidade. Ademais, achegou ás e aos asistentes as claves para a internacionalización a través dun decálogo baseado nalgúns aspectos de grande importancia como o descoñecemento, o capital humano, a planificación, as e os socios locais, a capacidade de adaptarse ou o uso das tecnoloxías que están ao noso alcance.
O CEO de Pilgrim Travel & Services e responsable de Márketing Dixital & Turismo de Ipglobal Tech Hub, Roberto Fraga, achegou ás asistentes e os asistentes varios casos de éxito a través de varios proxectos seus, como é o caso de Suite App, un proxecto que dixitaliza e mellora a experiencia da persoa usuaria en grandes cadeas de hoteis a nivel internacional.
Roberto Fraga falou ademais dun dos seus proxectos máis especiais, Pilgrim que, grazas ás novas tecnoloxías, achega información detallada e mellora a experiencia da ou o peregrino que realiza o Camiño de Santiago. O Camiño Portugués tradicional e da costa, o Camiño de Inverno, a Vía da Prata, a Ruta do Pai Sarmiento e a Ruta do Mar de Arousa e do río Ulla son os itinerarios xacobeos que atravesan a provincia de Pontevedra.
Ambos os relatores trasladaron ás e aos participantes os diferentes factores que deben ter en conta á hora de crear estratexias de internacionalización, como desenvolver unha xestión adecuada dos recursos, e recomendan aproveitar ao máximo as potencialidades que as novas tecnoloxías ofrecen.
Retos e oportunidades
Para finalizar a xornada, as e os relatores, baixo o mando do Director de Innovación e turismo intelixente de Globaldit, Enrique Lancis, que moderou a mesa de debate, abordaron diversas cuestións sobre os retos e oportunidades da Internacionalización do Sector Turístico .
Todos eles coincidiron en que, antes de iniciar un proceso de internacionalización, é importante exporse o motivo e as posibilidades de afrontar o reto. É necesario ademais contar coas novas tecnoloxías ao alcance, cuestionarse se os medios son os adecuados e se ese servizo ou produto está suficientemente consolidado no mercado orixinal.
Tamén é de vital importancia, subliñaron, a capacidade de adaptación ao novo mercado, polo que é necesario coñecelo a fondo. Aquí as e os expertos coincidiron en que é necesario superar a barreira idiomática, xa que o coñecemento doutras linguas a maiores do galego e o castelán é un elemento imprescindible no sector turístico para comunicarse e mellorar a experiencia das e os usuarios.
O mercado español, e o galego, son mercados aos que lles custa expandirse a outros, segundo as conclusións da mesa. As e os profesionais indicaron que era necesario cambiar o paradigma da formación desde as escolas e promover unha cultura máis aberta ao fracaso e a confiar en si mesma, principalmente.
Outro dos puntos que tiveron en conta durante o debate foi o de xestionar o talento, e coincidiron en que é necesario atopar un equilibrio entre formar talento e traelo de fóra . Este coloquio puxo o broche de ouro á xornada e permitiu resolver dúbidas, ademais de promover sinerxias entre os diferentes axentes turísticos.
