Fiestas en Rías Baixas
Atrás

Concurso fotografía Comemos polos Ollos (Noticia)

"Comemos polos ollos", o concurso no que mostrarás as túas dotes fotográficas e gastronómicas

Comparte en Twitter e Instagram imaxes de produtos da provincia de Pontevedra e gaña fantásticos premios

Libro María Vinyals

A Deputación de Pontevedra pon hoxe en marcha unha nova e creativa acción para promocionar a rica e variada gastronomía da provincia coa participación das usuarias e usuarios das redes sociais. A presidenta da institución, Carmela Silva, anunciou esta mañá a inauguración do concurso fotográfico Comemos polos Ollos, que se levará a cabo nos perfís de Twitter e Instagram de Turismo Rías Baixas e que lles invitará ás seguidoras e seguidores das dúas contas a compartir fotografías de produtos da provincia de Pontevedra, xa sexan ao natural ou cociñados.
 
“Sabemos que todos os nosos produtos son moi saborosos e fotoxénicos e que hai marabillosas e marabillosos artistas que nos poden transmitir esa beleza comestible que temos tan preto. Queremos que as usuarias e os usuarios das redes compartan esas imaxes con toda a comunidade”, declarou Carmela Silva.

Esta acción, enmarcada na campaña “Pontevedra Provincia na túa cesta”, ten como obxectivo poñer en valor os produtos locais e o traballo das produtoras e produtores da provincia a través da fotografía. A gastronomía é un dos activos consolidados do destino turístico Rías Baixas, segundo recolle o Plan estratéxico de turismo 2017-2020, e atesoura un alto potencial de captación de viaxeiras e viaxeiros.

Para participar no concurso é preciso seguir calquera das contas de Turismo Rías Baixas (@turisriasbaixas en Twitter e @turismoriasbaixas en Instagram) e incluír na publicación que acompañe cada fotografía o hashtag #comemospolosollos. O prazo de presentación de imaxes permanecerá aberto desde hoxe ata o 15 de xuño, e ao día seguinte de pecharse daranse a coñecer as fotografías gañadoras. As bases do concurso están colgadas na páxina web de Turismo Rías Baixas.

(PICA AQUÍ PARA VELAS).

Libro María Vinyals

“Peixe, carne, alimentos da horta, queixos, viños, mel… Todos estes produtos e máis forman parte de nós, da nosa provincia. Animámosvos a compartir con nós a cor, as formas e as texturas dos pratos e dos alimentos a través de imaxes que falan de historia e de experiencias, do noso, o que nos identifica, o que valoramos e polo que nos valoran”, resaltou a presidenta da Deputación.

Os premios: sete lotes de produtos das Rías Baixas

No concurso entregaranse sete premios repartidos en dúas categorías –produto cociñado e produto ao natural– e haberá unha mención especial á “mellor composición fotográfica”, na que se valorará non só a calidade técnica e artística, senón tamén a promoción da provincia de Pontevedra como destino gastronómico e a posta en valor da riqueza turística das súas distintas comarcas. Os premios para as gañadoras e gañadores consistirán en lotes de saborosos produtos das Rías Baixas.

“Entre todas e todos crearemos un inmenso bodegón fotográfico para comeren a provincia polos ollos. Experimenta e sorpréndenos”, animou a presidenta da Deputación.

PRODUTOS GASTRONÓMICOS