01.SABOREA A COMARCA DA PARADANTA
VIÑO E LAMPREA
VIÑO E LAMPREA
Saborea unha paisaxe con altos montes, vales tranquilos e ríos que culminan o seu percorrido no Miño. Unha terra fértil na que os seus habitantes mantiveron costumes e actividades moi vinculadas á natureza, coma a pesca da lamprea, o cultivo da viña, a explotación da madeira dos bosques ou a transformación da cera das abellas.
Convidámoste a revivir a tradición percorrendo as localidades de Arbo, Crecente, A Cañiza e Covelo.
Os montes da Paradanta danlle nome a unha comarca de terras altas nas que nacen ríos e abundantes regatos que debuxan pequenos vales e que culminan o seu percorrido no Miño. En Arbo aínda se conserva a arte da pesca da lamprea grazas á tradición e ás antigas pesqueiras, construcións no río que servían para a súa captura. A comarca tamén ten unha arraigada tradición vitivinícola que, actualmente, está en auxe coa mellora do viñedo. É de obrigada visita o Centro de Interpretación do Viño e da Lamprea, que divulga a tradición e a historia destes dous produtos representativos da localidade e, por extensión, da comarca.
A Paradanta tamén brinda a posibilidade de descubrir outras actividades tradicionais, coma a elaboración e transformación da cera das abellas, que se realizaba en obradoiros artesanais, ou a industria da madeira extraída dos seus bosques. O goce das paraxes naturais, mediante o sendeirismo ou outros deportes, é un estímulo para os sentidos que aconsellamos culminar coa degustación dos produtos emblemáticos, como a lamprea á bordelesa e o xamón da Cañiza maridados cun bo viño da terra.
- 1 - Crecente
- 2 - Arbo
- 3 - A Cañiza
- 4 - Covelo
MUSEOS
-
Centro dedicado a difundir a historia do viño e a tradicional pesca da lamprea, dous produtos que marcan a identidade do municipio. Durante a súa visita coñecerás as especificidades da vitivinicultura e das adegas, ademais da historia e os métodos de captura da lamprea.
-
Situada en plena zona antiga da Cañiza, nela exponse a obra pictórica de Diego Girález, recoñecido pintor hiperrealista e autor significativo da pintura contemporánea española.
-
O centro presenta o oficio de borreiro (cereiro), explica o proceso que orixina a formación da cera, as técnicas para a súa obtención, así como o traballo e o proceso de fabricación de velas ou exvotos.
-
Situado nun casarón moi ben conservado do século XVI, expón unha das coleccións etnográficas privadas máis importantes de Galicia, con máis de 6.000 obxectos, dispostos nas distintas estancias da casa.
OUTROS PUNTOS DE INTERESE
- As Laxas, 16, 36430 Arbo
- Finca A Moreira, s/n, 36438 Arbo
- Lugar O Torgo, Parada de Achas, 36887-A Cañiza
-
O antigo mosteiro da Franqueira atópase situado no corazón dos montes da Paradanta. O primeiro testemuño relativamente seguro da súa existencia procede de 1063.
-
Construído en 1922, o complexo consta do serradoiro, o sequeiro ou almacén de madeira, unha pequena forxa, un pequeno almacén e un forno para eliminar os residuos. A través de raís, as vagonetas transportaban a madeira ata o interior do serradoiro. Especializouse na fabricación de carros.
MOMENTOS GASTRONóMICOS
-
Festa de Interese Turístico Nacional que ten lugar en abril e na que en carpas ou nos restaurantes e bares da localidade se pode degustar lamprea, elaborada de diferentes maneiras: en empanada, seca ou rechea, acompañada de viño do Condado.
-
Festa que ten lugar en agosto na que se pode degustar a lamprea desecada nos secadoiros da localidade e cociñada de diferentes maneiras: asada, rebozada, rechea, con fideos… sempre acompañada cos mellores viños da D. O. Rías Baixas da Subzona de O Condado.
-
Festa de Interese Turístico de Galicia que ten lugar en agosto, promociona o produto máis coñecido da Cañiza: o xamón. O clima frío e seco da localidade garante a boa curación das carnes, especialmente dos xamóns.
ENCLAVES NATURAIS
-
É probable que as pesqueiras ou pescos que hai na beira do río Miño sexan de época romana. Conforman un patrimonio único que se segue utilizando e que consiste en construcións de pedra en forma de paralelepípedos que provocan correntes e facilitan a captura de distintas especies de peixes de río, fundamentalmente o salmón, a lamprea e a zamborca. Existe unha ruta sinalizada que percorre un pequeno tramo do río Miño con pesqueiras.
