07.SABOREA A COMARCA DO MORRAZO
ENTRE O MAR E A TERRA
ENTRE O MAR E A TERRA
Descubre a comarca do Morrazo e visita as localidades de Moaña, Cangas, Bueu e Marín e o seu contorno. A situación da península do Morrazo, entre as rías de Pontevedra e de Vigo, confírelle unha posición singular entre o mar e a terra.
A terra está dominada polos montes de Domaio, que, situados no centro da península, evidencian a importancia estratéxica e simbólica que tivo o lugar en tempos afastados. Poderás descubrir dolmens, petróglifos e castros, e mesmo un excepcional santuario da Idade do Ferro no monte do Facho.
O mar está sempre presente e forma parte da identidade da comarca, como mostra a arraigada tradición mariñeira, pesqueira e conserveira. Descúbreo visitando o interesante Museo Massó, promovido por unha das industrias máis importantes no sector das conservas, as antigas baleeiras ou as industrias de cabos e cordas para o sector pesqueiro.
Poderás percorrer lugares que ofrecen panorámicas únicas de gran beleza, cantís, praias tranquilas, paisaxes virxes e montes; unha diversidade que tamén se traduce na súa variada gastronomía baseada en produtos do mar, así como en verduras e froitas, todas elas de excelente calidade.
- 1 - Marín
- 2 - Moaña
- 3 - Cangas
- 4 - Bueu
MUSEOS
-
A súa orixe remóntase á visita que Guillermo Marconi realizou á fábrica de conservas Massó no ano 1928. Foi daquela cando suxeriu a creación dun museo para expoñer a colección de instrumentos de navegación, documentos e libros, obxectos diversos e maquetas de barcos que conservaba a familia. Desde entón incrementáronse as coleccións e, xestionado desde 1994 pola Xunta de Galicia, mostra a historia pesqueira, baleeira e conserveira de Bueu.
-
É unha das concentracións de petróglifos máis importantes de Galicia, entre os que destaca unha singular representación de labirintos ademais de círculos, cazoletas e un cervo. Acompáñaos un centro de interpretación que ofrece información sobre os petróglifos e tamén sobre o patrimonio cultural de Marín e da comarca do Morrazo.
-
O museo, inaugurado en 1992, xurdiu grazas á doazón do pintor Manuel Torres Martínez de máis de 70 obras ao Concello de Marín. O artista, que naceu en Marín no ano 1901, recibiu unha grande influencia de Carlos Maside, do que era bo amigo. O mar e o campo convertéronse nas súas fontes de inspiración en obras dun marcado carácter folclorista.
OUTROS PUNTOS DE INTERESE
-
Monumento funerario megalítico construído hai máis de 5.000 anos, formado por unha cámara poligonal e por un corredor construídos con grandes laxas de pedra. En orixe, o dolmen estaba completamente cuberto de terra (mámoa), aínda que só se conserva unha parte.
MOMENTOS GASTRONóMICOS
-
Evento que ten lugar en setembro, no que se promociona a navalla, un produto autóctono colleitado polos navalleiros da Confraría de San Xosé. As navallas á prancha son a modalidade máis común, pero tamén se preparan á brasa, en revolto, salteadas ou en tosta.
-
Cita gastronómica que ten lugar en agosto na que se pode degustar polbo preparado de distintas maneiras: desde o tradicional polbo á feira, en caldereta, frito, á prancha ou en empanada, ata receitas máis atrevidas como en croquetas ou en paté.
-
Festa de Interese Turístico de Galicia que ten lugar no mes de abril, homenaxea o millo corvo, millo cun gran de cor negra que deixou de utilizarse hai décadas e que en 1998 se recuperou seguindo as técnicas tradicionais. Degústanse receitas elaboradas con este tipo de millo.
-
Evento gastronómico que ten lugar no mes de xullo no que se degusta a cigala cociñada de distintas maneiras: cocida, en salpicón, en empanada…
ENCLAVES NATURAIS
-
Con 636 metros de altitude é unha estratéxica atalaia e o punto máis alto da serra do Morrazo, que brinda unha panorámica aberta sobre As Rías Baixas e as illas atlánticas, a ría de Vigo e as montañas que conforman o linde do río Miño entre Galicia e Portugal.
-
É o punto máis occidental da península do Morrazo, unha paisaxe virxe dunha beleza espectacular, onde o mar domina, xunto cos piñeirais, os cantís e as tranquilas e areosas praias de Nerga e Barra.
-
É parte do terreo do antigo pazo coñecido como Casa Torre de Aldán, de acceso público. Popularmente coñécese como o Bosque Encantado, un contorno de frondosa vexetación cun camiño que segue o leito do río Orxas ata un muíño e unha torre dun castelo inacabado.
-
Pola costa oeste do municipio de Bueu o Cabo Udra ponlle final á baía de Aldán e sinala o principio da ría de Pontevedra nunha sucesión de pequenas enseadas entre puntos rochosos. Desde o cume do cabo, a 91 metros de altitude, e desde o alto de Carafixo, a 129 metros, as panorámicas son sorprendentes, con vistas á ría de Pontevedra e á illa de Tambo.
-
Trátase dunha ruta de gran beleza que enlaza varios itinerarios que, unindo praias ou portos con bandeira azul, contribúen positivamente ao uso sostible do litoral. Comprende o seguintes tres tramos: Ruta das Praias, Ruta dos Cinco Miradoiros e Ruta Montes e Praias.
-
O arquipélago de Ons, situado na bocana da ría de Pontevedra, está formado pola illa de Ons e varios illotes, e forma parte do Parque Nacional das Illas Atlánticas. É un lugar illado de gran beleza e cun relevo accidentado, con praias de auga cristalina, cantís e zonas de arboredo. Pódese percorrer a pé ou en bicicleta.
OUTROS PUNTOS DE INTERESE
- Dolmen de Chan de Armada
Monumento funerario cunha cámara de forma poligonal e cun corredor construído con grandes laxas. Non conserva a cuberta.
[+] INFO - Castro da Subidá
Poboado da Idade do Ferro situado no alto da Porteliña que perdurou en época romana. Dispón dunha dobre muralla, unha pequena acrópole ovalada e vivendas de planta circular. Os obxectos recuperados testemuñan unha economía agrícola e gandeira pero tamén baseada na pesca e o marisqueo.
[+] INFO
MOMENTOS GASTRONóMICOS
- Mercado de abastos, porto pesqueiro e lonxa (Bueu)
Non deixes de visitar o mercado tradicional de abastos de Bueu, con postos de venda de produtos frescos e de tempada, o porto pesqueiro e a lonxa de peixe e marisco.
[+] INFO [+] INFO
ENCLAVES NATURAIS
- Cabo Home
É un lugar estratéxico a escasa distancia das illas Cíes e configura un lugar moi perigoso para a navegación debido ás correntes, saíntes rochosos, néboas e altas ondas. É por iso que dispón de tres faros, un situado en cada punta, para advertir ás embarcacións dos perigos.
[+] INFO - Parque dos sentidos - granxa de Briz
En orixe era unha antiga granxa dos monxes de Oseira. Dispón de xogos infantís, unha zona de aventura, unha lagoa natural e outra artificial, un auditorio ao aire libre e unha vivenda tradicional con árbores froiteiras, vides e especies vexetais autóctonas.
[+] INFO - Praia de Rodeira (Cangas)[+] INFO
- Club de Golf Ría de Vigo (Moaña)[+] INFO
