O equipo de Rías Baixas Film Commission desprazouse recentemente ao set de rodaxe de Marusía: vientos de honor, a nova serie producida por Mediaset e protagonizada por Lucía Jiménez e Alfonso Bassave. A ficción, ambientada en distintos enclaves das Rías Baixas, volve situar este territorio como un escenario ideal para producións audiovisuais de gran formato.

Este servizo público e gratuíto, ofrecido pola Deputación de Pontevedra a través de Turismo Rías Baixas, prestou o seu apoio á produción na xestión e coordinación dos permisos de rodaxe necesarios, facilitando así o traballo do equipo técnico e asegurando o cumprimento da normativa vixente.

A colaboración co sector audiovisual forma parte da estratexia de Turismo Rías Baixas para promocionar a provincia como un destino de cine, reforzando a súa visibilidade a nivel estatal e internacional e contribuíndo ao desenvolvemento económico e cultural do territorio.