Casas de Oya

Obra do arquitecto francés afincado en Vigo Michel Pacewicz, o proxecto foi encargado por José García Barbón no ano 1904. Trátase dun edificio ecléctico de corte francés e base neobarroca de forte simetría. A horizontalidade da composición está remarcada pola balconada corrida da primeira e última plantas. Destacan tamén os miradoiros de pedra da segunda planta, con decoración clasicista composta por pilastras con capiteis xónicos que sustentan un friso a modo de entaboamento. Neste caso, a individualización por plantas tan característica do estilo ecléctico é case imperceptible. A planta baixa é de cantería, con almofadado nas pilastras que soportan os arcos de medio punto. A coroación do edificio é unha combinación de peitorís e varandas de granito, sobre as que se sitúan bufardas rematadas en frontóns curvos e partidos adornados con volutas nos laterais inferiores. Actualmente alberga o Hotel NH Palacio de Vigo.