A través desta primeira edición, deuse visibilidade a iniciativas comprometidas cun turismo de calidade, sostible e respectuoso co patrimonio natural, cultural e social do territorio. Os premios recoñeceron tamén o labor de profesionais e entidades que, coa súa actividade, contribuíron a enriquecer a experiencia das persoas visitantes e a impulsar o desenvolvemento económico local, reforzando o papel do turismo como un dos principais motores da provincia. Estes galardóns xorden como unha forma de valorar o esforzo, a dedicación e a capacidade innovadora dos diferentes axentes que traballan para mellorar a oferta turística e reforzar a imaxe das Rías Baixas como destino de referencia.

A gala celebrada o pasado 28 de maio no Parador de Baiona, reuniu a representantes institucionais, profesionais do sector, empresas, concellos e entidades de toda a provincia. Durante o acto distinguíronse iniciativas e traxectorias vinculadas á innovación, á sustentabilidade, á promoción turística, á excelencia na atención ás persoas visitantes e á traxectoria profesional, ofrecendo unha ampla mostra da diversidade e do dinamismo que caracterizan o sector turístico das Rías Baixas.

Galardoados e galardoadas:

• Francisco González López — Traxectoria turística 
• Mar Rodríguez Meseguer — Innovación en turismo 
• Piragüilla — Turismo responsable 
• Bosque de Nadal de Noalla — Experiencia máis destacada nas redes sociais
• Aldeas de Nadal de Lalín — Mellor proxecto municipal
• Mar de Santiago — Mellor oficina de turismo da rede de oficinas INFO RIASBAIXAS
• Valentín Verea — Mellor persoa informadora turística
• Casa do Patrón — Recoñecemento á traxectoria

Con estes galardóns, a Deputación de Pontevedra reafirma o seu compromiso coa promoción dun turismo sostible, innovador e de calidade. Os I Premios Turismo Rías Baixas nacen coa vocación de consolidarse como unha cita de referencia para poñer en valor o traballo de persoas e entidades que contribúen ao fortalecemento do sector, ao tempo que proxectan as Rías Baixas como un destino competitivo, diverso e atractivo durante todo o ano.