A Deputación de Pontevedra, a través de Turismo Rías Baixas, participou nunha das últimas reunións de coordinación para ultimar a implantación dunha innovadora plataforma museográfica virtual dedicada á Rapa das Bestas.

Este proxecto, enmarcado dentro do Plan de Sostibilidade Turística do destino Deza - Terra de Montes e financiado cos fondos Next Generation, poñerá en valor o patrimonio cultural e etnográfico da provincia, buscando ofrecer á cidadanía e ás persoas visitantes unha experiencia inmersiva que permita coñecer en profundidade a tradición da Rapa das Bestas de Sabucedo, declarada de Interese Turístico Internacional.

A nova plataforma integrará recursos audiovisuais, contidos interactivos e materiais divulgativos que achegarán a públicos de todo o mundo a historia, o simbolismo e a riqueza cultural desta celebración única. O obxectivo é contribuír tanto á difusión desta manifestación como á súa consolidación como atractivo turístico sostible e de calidade no ámbito das Rías Baixas.