A Deputación de Pontevedra foi recoñecida co premio de ouro na categoría de Produto Turístico/Destino Rural no prestixioso Festival Terres 2025, consolidando así o seu recoñecemento na promoción turística sostible e innovadora.

O galardón, outorgado en Tortosa e recollido por Romina Fernández, directora de Turismo da Deputación de Pontevedra, distingue a campaña deste ano pola súa capacidade de poñer en valor o patrimonio natural, cultural e humano da provincia, apostando por un modelo de turismo respectuoso, próximo e auténtico.

A campaña acada así o seu cuarto galardón do ano, demostrando que conseguiu conectar con públicos nacionais e internacionais, transmitindo un relato que combina paisaxes singulares, experiencias de calidade e a identidade rural da provincia de Pontevedra como un destino diferencial en Galicia e en Europa.