A Lanzada

Na costa norte, entre Sanxenxo e O Grove, atoparás a impresionante praia da Lanzada, unha das máis famosas de Galicia, en mar aberto e con ondas moi apreciadas polas e polos surfistas e amantes dos deportes náuticos en xeral. Os seus 2,5 quilómetros de areal ofrecen alternativas para todos os niveis.

Patos é un dos lugares ideais na ría de Vigo; e a costa de Oia atrae as e os deportistas máis experimentados.

En Sanxenxo atópanse as praias de Foxos, de nivel medio, e a de Fontenla, cunha onda XXL que rompe con grandes temporais, máis adecuada para surfistas de nivel avanzado. Cara ao sur, Montalvo —unha das mellores praias para surfear en Galicia— ofrece unha onda potente que rompe con mar de fondo. No mesmo municipio está Canelas, apta para todos os niveis; e a dos Mortos, en Areas, para as e os expertos.

Ría de Vigo

Xa na ría de Vigo, unha das mellores praias para surfear en todos os niveis é a de Patos, en Nigrán. Xunto á de Prado, a calidade das ondas de ambas é magnífica para a iniciación. A dereita, onde se forma A Cala, con condicións óptimas, rompe unha onda curta e contundente. Nesta zona, o pico de Patos, con ondas de dereita, regala a mellor onda da ría. Outro dos clásicos é o pico de Monteferro, con ondas de esquerda, constantes e de gran calidade.

A costa meridional da provincia é un dos territorios ideais para practicar surf, unha zona recomendada só para xente experta. Ao sur da enseada do mosteiro de Santa María de Oia atopamos un enclave de dificultade alta, con vento sur, ondas rápidas e costa rochosa. Nesta zona, as ondas de San Francisco, Cantos e F3, ou a Salvaxe, son todo un reto.