Entre o Toxa e Carboeiro
Unha viaxe entre fervenzas, bosques e patrimonio
A ruta que conecta a fervenza do Toxa co mosteiro de Carboeiro, no municipio de Silleda, é unha das experiencias máis recomendables para descubrir a riqueza do interior das Rías Baixas. Un percorrido que se pode gozar durante todo o ano e no que o son da auga, o rumor do bosque e a arquitectura relixiosa se mesturan para crear unha paisaxe inigualable.
Este itinerario convida a descubrir un dos recunchos máis fermosos da comarca de Deza, onde o tempo parece deterse para que auga, natureza e historia vivan en perfecta harmonía. Trátase dunha proposta ideal para as e os sendeiristas, as familias que buscan fuxir do bulicio das cidades e de quen busca desconectar e descubrir o gran patrimonio natural e cultural da provincia de Pontevedra.
A orixe
A historia do noso escenario está vinculada ás augas que o percorren, en particular á dos ríos Toxa e Deza, cuxas correntes suavizaron durante séculos unha paisaxe chea de vales, bosques e formacións rochosas. Estas sendas fluviais foron desde tempos antigos imprescindibles para a vida das comunidades do interior, que, aproveitando os seus recursos, construíron camiños para comunicar as pequenas formacións da comarca.
Froito desta unión entre pobo e natureza nace o mosteiro de San Lourenzo de Carboeiro, cuxas orixes se remontan ao século x. Este antigo centro do catolicismo desempeñou un papel chave na historia da comarca e trátase dun dos conxuntos monásticos máis destacados do interior de Galicia.
Percorrido
A ruta (coñecida como Sendeiro de Deza ou PR-G 18) ten unha lonxitude aproximada de 6 quilómetros de ida e unha dificultade moderada, aínda que con algúns tramos de pendentes que requiren un esforzo relativo. O percorrido pode realizarse en ambos os sentidos, comezando na fervenza do Toxa ou no mosteiro de Carboeiro, cunha paisaxe na que predominan a auga e a vexetación.
Se saímos desde a fervenza, o camiño descende cara ao río Toxa ata chegar ao lugar onde as súas augas se mesturan co Deza. Ao longo do itinerario atravésanse bosques cheos de árbores autóctonas, pequenos núcleos rurais e lugares de interese coma a ermida de San Paio ou a praia fluvial da Carixa. A continuación, a ruta segue cara á contorna de Carboeiro, onde os antigos camiños e as pontes de pedra, entre elas a famosa ponte do Demo, anuncian a proximidade do mosteiro.
Fervenza do Toxa
Protagonista absoluta da ruta, trátase dunha das fervenzas máis espectaculares de Galicia, co salto de auga máis alto da comunidade autónoma: ten unha caída de 30 metros e unha altura total que supera os 60 metros. As súas augas caen entre grandes paredes de pura rocha e crean unha impresionante paisaxe que en épocas de choiva ofrece un espectáculo natural inigualable. O son da auga ao bater contra as rochas e a brétema que se forma aos seus pés converten esta marabilla nun lugar cunha atmosfera e beleza sen par.
Ademais, a paisaxe conta con miradoiros naturais desde os que é posible contemplar a fervenza e a contorna que a rodea. Tamén se pode descender ata a súa base a través dunha senda chea de carballos, castiñeiros e outras especies típicas.
Mosteiro de Carboeiro
Trátase do outro protagonista do percorrido, neste caso no aspecto patrimonial, e unha das xoias do románico galego. Fundado no século x, este antigo mosteiro beneditino atópase nunha contorna privilexiada, rodeado de abundante vexetación e protexido polo río Deza. A súa localización ocúltase aos ollos polas árbores, o que dota o conxunto dunha aura de misterio e, á vez, tranquilidade.
A construción actual, que tivo lugar durante os séculos xii e xiii, destaca pola combinación de elementos románicos e góticos. As súas columnas e características bóvedas reflicten a importancia que alcanzou este centro relixioso outrora. Hoxe, o conxunto é un dos testemuños arquitectónicos máis únicos das Rías Baixas.
