Igrexa de Nosa Señora de Fátima

Igrexa de xogos neoclásicos, está realizada totalmente en cantería, é obra do arquitecto Antonio Cominges e data de 1959. No exterior da fachada principal, sobre o lintel da porta, hai unha imaxe da Virxe de Fátima e un rosetón. Á dereita da igrexa, pegada a ela, destaca unha torre esvelta. O interior sobresae pola súa ampla capacidade e polo seu retablo, que conta cun mosaico, obra de Santiago Padrós y Elias. Nel represéntanse os principais misterios da Cova da Iria. No centro, a Virxe sobre a árbore da aciñeira nas súas aparicións de 1917; ao carón o anxo que, un ano antes, e en tres ocasiones, se lles apareceu aos tres pastorciños (Lucía, Jacinta e Francisco) preparándoos para o encontro coa Nosa Señora de Fátima; ao outro lado, na parte baixa, os videntes; e, máis arriba, recóllese o fenómeno da danza do sol, ocorrido o 13 de outubro de 1917 e visto por unhas cen mil persoas, miles delas a varios quilómetros de distancia.