Colección de arte Francisco Fernández del Riego

A colección sitúase na Casa Galega da Cultura. En 1995 Francisco Fernández del Riego (Vilanova de Lourenzá, 1913) dooulle os seus fondos bibliográficos, documentais e artísticos á cidade de Vigo, onde viviu e traballou durante moitos anos e á que lle dedicou boa parte dos seus esforzos. A colección está integrada por máis de 20.000 títulos, aos que hai que engadirlles a correspondencia persoal que Fernández del Riego mantivo, ao longo de décadas, coas máis destacadas figuras do galeguismo e da intelectualidade no período de entre guerras. A colección artística, eixe do museo e altamente representativa da arte galega desde finais do século xix, está composta por 254 pezas, das cales 79 son obras pictóricas de artistas coma Maside, Castelao, Minguillón, Díaz Pardo, Torres, Colmeiro, Ruibal ou Granell. Neste ámbito artístico tamén se poden atopar obras dos escultores Faílde Gago e Elena Colmeiro, así como fotografías e obxectos persoais que testemuñan a condición de erudito e que constatan, en definitiva, o significado intelectual, galeguista e amigo das artes que Fernández del Riego tivo nos círculos artísticos. Desde o punto de vista cronolóxico, a primeira colección é de autoría de Ovidio Murguía, fillo de Murguía e Rosalía de Castro.