Edificio Simeón

Este edificio foi construído entre 1907 e 1911 para albergar a casa comercial Viuda e Hijos de Simeón García, con vivendas nos pisos superiores, ás que se accedía polas fachadas laterais. Deseñado por Manuel Gómez Román, conta cunha planta baixa dedicada ao comercio e tres pisos, o último deles abufardado. A construción ten un carácter monumental e luxoso, cunha excelente cantería en granito. A súa fachada principal presenta un estilo ecléctico de influencia francesa, organizada ao redor dun corpo central rematado nunha cúpula.

A decoración en granito, de estilo modernista, inclúe unha variada representación de flora e fauna. Os elementos ornamentais atópanse principalmente nos linteis, claves, ménsulas, remates das pilastras e balcóns. Destacan o rostro feminino enmarcado por decoración vexetal na clave do van central inferior, as pilastras decoradas con pombas e formas vexetais, e as gárgolas con figuras monstruosas. Ademais, o uso de ferro con formas curvilíneas, especialmente nos balcóns, lembra o estilo art nouveau.