Museo Verbum - A casa das palabras

Proxectado polo arquitecto galego César Portela e situado na contorna da praia de Samil, VERBUM é un museo interactivo sobre todos os ámbitos relacionados coa comunicación humana; deseñado como un espazo cultural, lúdico e divulgativo no que se pode participar dun modo activo nos elementos expositivos. Estrutúrase en catro plantas unificadas por unha caixa de luz que as atravesa e relaciónaas, semellando un conxunto de caixas chinesas que se conteñen unhas ás outras. O museo é un espazo de entretemento que permite experimentar e coñecer, a través de xogos, todo o relacionado coas linguaxes, os idiomas, as palabras, as letras, os sons, os signos, os símbolos, a vista, o oído, a lectura, a escritura, a literatura e a tecnoloxía. O deseño expositivo organízase en 29 cubos que conteñen, no seu interior, un total de 81 módulos que desenvolven as distintas temáticas do museo: linguaxe, ciencia, literatura e tecnoloxía.