Os destinos turísticos Starlight son lugares visitables que gozan de moi boas calidades para contemplar os ceos estrelados e que, ao estar protexidos da contaminación luminosa, son especialmente adecuados para desenvolver neles actividades turísticas baseadas nese recurso natural.
Estes non só deben acreditar a calidade dos seus ceos e os medios para garantir a súa protección, senón que tamén contan con infraestruturas adecuadas e desenvolven actividades relacionadas coa oferta turística (aloxamento, medios de observación dispoñibles ao servizo das e dos visitantes, persoal con formación en interpretación astronómica etc.) e integradas na natureza. No caso de que o lugar non dispoña aínda destas infraestruturas e actividades, valórase que elabore un proxecto para desenvolvelas no futuro.
A Fundación Starlight, unha entidade de ámbito internacional vinculada ao Instituto Astrofísico de Canarias, creou este sistema de certificación co obxectivo de fomentar, a nivel mundial, a mellora da calidade das experiencias turísticas e a protección dos ceos nocturnos nos destinos Starlight. Os criterios establecéronse en decembro de 2010, no centro da Organización Mundial do Turismo en Madrid, con representantes da Unesco, do Programa sobre o home e a biosfera da Unesco, e do Instituto Astrofísico de Canarias.
Destino turístico Starlight Parque Nacional Marítimo-Terrestres das Illas Atlánticas de Galicia
Este parque nacional está situado no destino Rías Baixas-provincia de Pontevedra e componse de catro arquipélagos: Cortegada e Sálvora, na ría de Arousa; Ons, fronte á ría de Pontevedra; e Cíes, na ría de Vigo.
Foi declarado destino turístico Starlight en 2016 pola Fundación Starlight, o que supón o recoñecemento da calidade dos seus ceos, o seu compromiso con preservar as súas condicións de pouca contaminación luminosa e a existencia de iniciativas turísticas relacionadas coa contemplación do ceo como unha parte esencial da natureza.
Nas illas é posible apreciar con claridade o ceo estrelado. Por outra banda, a espectacularidade e a riqueza da súa fauna e a súa flora fan destas illas un patrimonio, cultural e natural único no litoral español.
O Centro de Interpretación do Parque Nacional Marítimo-Terrestre das Illas Atlánticas, situado nun edificio histórico no zona vella da cidade de Vigo, ofrece actividades nas que se mostran os valores naturais, os culturais e os relacionados coa observación e coa protección do ceo nocturno.
Para máis información:
Compartir