Co obxectivo de consolidar a posición de Rías Baixas como destino de referencia, Turismo Rías Baixas lanzouse á promoción do destino tanto a nivel nacional como internacional, coa presenza na xa celebrada World Travel Market en Londres, Fairway en Santiago de Compostela (9–11 de novembro), INTUR en Valladolid (14–16 de novembro) e XANTAR en Ourense (20–23 de novembro).

Ao longo destas citas, Rías Baixas dará a coñecer os seus principais atractivos turísticos e manteranse encontros con operadores profesionais, axencias, prensa especializada e entidades do sector co fin de fortalecer a comercialización do destino en diferentes ámbitos, tanto nacionais como internacionais.

A presenza na World Travel Market constitúe un fito institucional ao tratarse da primeira participación nesta feira, o que permitirá potenciar a visibilidade da provincia no mercado británico, segundo país emisor internacional para Galicia.

Fairway, pola súa banda, ofrece un espazo único para mostrar ao público asistente a oferta turística das Rías Baixas arredor dos Camiños Xacobeos que atravesan a provincia. En INTUR, principal evento especializado en turismo de interior en España, Rías Baixas reforzará a súa posición como referencia neste ámbito e nas experiencias sostibles, mentres que XANTAR ofrece a oportunidade de establecer conexión entre territorios e posicionar o destino e os seus produtos enoturísticos e gastronómicos.

Con esta axenda, o Servizo de Turismo Rías Baixas reafirma o seu compromiso coa dinamización do sector turístico e co apoio ao tecido empresarial, favorecendo a atracción de visitantes durante todo o ano e a diversificación de públicos e mercados.