Castros en paisaxes de lenda

Castros en paisaxes de lenda

Pontevedra é unha potencia en patrimonio arqueolóxico. Os seus castros xunto ao mar e os restos de asentamentos romanos que se conservan trasládannos no tempo para coñecer a orixe das súas cidades

A provincia de Pontevedra propúxose rescatar do esquecemento o rico patrimonio histórico e cultural que representan os seus xacementos arqueolóxicos. E máis aló dos segredos que atesouran, as e os castrexos elixiron para os seus poboados lugares altos e ben situados que hoxe os converten en excepcionais miradoiros sobre a costa e o interior deste destino. Estas paisaxes de lenda alentan a calquera visitante para internarse nas orixes das cidades das Rías Baixas, desde as antigas citanias ata os posteriores asentamentos romanos.

O castro de Santa Trega é dos mellor conservados de Galicia, con vistas aéreas sobre A Guarda e a fronteira con Portugal. Está datado entre os séculos i a. C. e i d. C., e as primeiras escavacións realizáronse de maneira fortuíta en 1913. Hoxe pódense visitar dúas casas reconstruídas e un museo. Sen saír do Baixo Miño, a ruta inclúe o castro Alto dos Cubos, en Tui, e a seguinte parada xa é Vigo. A cidade fixo un grande esforzo nos últimos anos por recuperar o poboado do Castro e o edificio do Museo do Mar integra os restos do xacemento de Punta do Muíño do Vento. Merece a pena achegarse a Salinae, con restos da antiga fábrica de sal xunto á ría, antes de cruzar a porta da vila romana de Toralla.

A mellor opción é trasladarse logo ata Cangas para subir ao monte do Facho, onde se conserva un poboado con vistas únicas ás illas Cíes e á illa de Ons.

É importante non esquecerse do castro da Subidá, en Marín, e do de Alobre, en Vilagarcía de Arousa. Tamén é obrigada a visita a Castrolandín (Cuntis).

O castro de Santa Trega é dos mellor conservados de Galicia, con vistas aéreas sobre A Guarda e a fronteira con Portugal

As e os castrexos das Rías Baixas deixaron moitos poboados abandonados tras a chegada dos romanos, trasladándose a novos asentamentos a pé de costa ou en vales. No Salnés pódese pasear polo xacemento da Lanzada e de Adro Vello, e finalizar o percorrido en Valga para coñecer a historia da Igrexa Vella.

Ponte entre o Mediterráneo e o Atlántico

Os achados no xacemento da Lanzada testemuñan que a provincia de Pontevedra ocupaba un lugar estratéxico no intercambio comercial entre os pobos do Mediterráneo e do Atlántico. As escavacións desbarataron o tópico dunha terra illada e acreditaron contactos fluídos con outras culturas desde o século vi a. C. As Rías Baixas formaban parte dos circuítos comerciais de longo percorrido controlados por cartaxineses e, posteriormente, por gadiritas.