Parque Arqueolóxico de Arte Rupestre
Unha viaxe polos labirintos de pedra
Os gravados rupestres de Campo Lameiro son únicos en Europa
O agradable paseo pola espléndida Ruta dos Petróglifos de Campo Lameiro ten nove escalas, cada unha cun mural en roca natural no que os nosos antepasados representaron escenas de caza, misteriosos labirintos, armas e outras imaxes. Un pequeno panel en cada unha destas estacións serve de guía para diferenciar as liñas gravadas pola man do ser humano das marcas naturais da pedra.
Algunhas, como a Laxe dos Carballos, son magníficos e fermosos lenzos de grandes dimensións labrados na pedra nos que se distinguen perfectamente varias escenas dentro dunha composición coral. No Outeiro dos Cogoludos sentiremos a maxia dos labirintos da Idade de Bronce. A incógnita sobre o que representaban chega ata os nosos días.
A visita da zona arqueolóxica finaliza coa parada no poboado da Idade de Bronce. Trátase dunha recreación de gran calidade, con varias cabanas, estruturas de almacenamento e cercados para os animais, todo construído cos mesmos materiais que empregaban os nosos antepasados. É o final perfecto para reproducir como vivían os galegos de hai catro mil anos.
Pezas históricas e tecnoloxía
Paneis, pantallas, réplicas e antigas pezas achadas nas escavacións como lascas, coitelos ou puntas de frecha guíannos na nosa viaxe ao pasado
A exposición, dentro do edificio do Parque Arqueolóxico de Arte Rupestre, ofrécenos algunhas respostas ás preguntas que nos facemos no percorrido exterior e presenta a información dunha maneira didáctica, visual, sinxela e atractiva. Mentres avanzamos pola exposición, distribuída en nove sectores, podemos observar e visitar o interior dunha cabana reproducida con todos os seus utensilios para coñecer mellor a vida doméstica das e dos galegos da Idade de Bronce. Atopamos tamén a sorprendente réplica a tamaño natural dun cazador, ataviado desde cabeza ata os pés coas súas peles para abrigarse e coas armas que empregaba na procura de animais cos que alimentarse.
Unha inquietante banda sonora acompáñanos no percorrido. O son sae dunha sala na que se proxecta un espectacular vídeo de sete minutos e medio. A produción, en tres pantallas de grandes dimensións e cunha acústica que nos envolve, trasládanos á época na que se realizaron os petróglifos e preséntanos distintas hipóteses que formulan as investigacións para explicar o sentido destes gravados.
A visita finaliza cun sector que nos conciencia da importancia que ten conservar as fráxiles mostras de arte rupestre ante o lento proceso de degradación que sufriron ao longo dos séculos.
O edificio do parque arqueolóxico é, ademais, outro dos atractivos desta capital da arte rupestre europea. A forma do seu corpo alongado e irregular evoca a figura dos cervos gravados nas rocas hai miles de anos. A cuberta do inmoble, composta por lousa de pedra, cambia de tonalidade durante o día co xogo cromático que produce a luz natural. A estrutura emerxe do terreo para integrarse nunha paisaxe máxica no que atopamos, debuxada na pedra, unha parte da nosa historia.
O corpo alongado do edificio do Parque evoca a forma dos cervos debuxados hai catro mil anos e emerxe do terreo para integrarse na paisaxe
E para completar o día…
Campo Lameiro ten outros atractivos que se poden visitar para completar a excursión arqueolóxica. O río Lérez pasa polo termo municipal e alí atopamos a praia fluvial de Redonde, ideal para o descanso. Está rodeada de carballeiras con mesas, randeeiras e outros equipamentos para pasar unhas horas de relax no medio da natureza. Son especialmente fermosas as carballeiras de Rozas e San Brais.
E se se trata de espazos naturais, atopamos un estupendo no monte Agüeiros, cunhas impresionantes panorámicas e outra importante pegada do noso pasado. Alí está o castro de Penalba, un dos máis antigos de Galicia, do século VIII a. C. Na cima do monte atópase outro petróglifo, o de Pedra da Serpe; e preto de alí, a 400 metros, o de Rotea do Mendo.
