Rías Baixas: as celebracións que fascinan ao mundo
En ningún outro recuncho atoparás tanta vida concentrada en tan pouco espazo. Aquí, as receitas transmítense como xoias, os pobos celebran a súa historia ao grande e o pasado cobra vida en cada festa. Dende viños que falan do esforzo e da terra ata rituais onde natureza e tradición se enfrontan sen palabras. Nas Rías Baixas, cada estación trae o seu propio espectáculo: desfiles de flores, batallas simbólicas, arrecendos ancestrais e sabores que deixan pegada. Ven, e déixate levar por unha terra que sabe como celebrar o seu.
No inverno, Lalín transfórmase na capital mundial do cocido. O que naceu en 1968 como unha xornada dedicada a enxalzar a gastronomía local evolucionou ata converterse en todo un Mes do Cocido. Esta localidade da comarca do Deza reúne a decenas de miles de persoas que acoden a gozar deste prato tradicional, unha receita que combina máis dunha ducia de ingredientes para ofrecer, en cada bocado, o auténtico sabor do mellor cocido.
Baiona acolle cada ano unha das celebracións medievais máis singulares das Rías Baixas. A vila transfórmase para revivir un feito histórico: a chegada da Carabela Pinta, o 1 de marzo de 1493, con Martín Alonso Pinzón ao mando, anunciando o descubrimento dun novo mundo. Durante estes días, a localidade énchese de vida con cabaleiros, damas, artesáns, ferreiros, bufóns, taberneiros, meigas e outros personaxes que devolven ao presente a atmosfera do século XV. Milleiros de persoas somérxense nesta experiencia única, onde a historia se converte en espectáculo.
Con máis de 500 millóns de anos de historia, a lamprea é un dos peixes máis antigos do planeta. Nace no río, descende ata o mar e regresa ao Miño para completar o seu ciclo vital. En Arbo, este curioso e apreciado manxar é o protagonista dunha das festas gastronómicas máis destacadas de Galicia. Alí cociñase de múltiples formas e convértese no centro dunha celebración que tamén pon en valor os produtos de calidade das comarcas de Condado-Paradanta.
O que comezou a principios do século XIX como un costume sinxelo de decorar o paso do Corpus Christi con pequenas alfombras florais en Ponteareas, converteuse hoxe nunha gran celebración de arte efémero recoñecida a nivel turístico. Toda a comunidade vólcase na creación dun impresionante tapiz de máis de 5.000 metros cadrados, feito con flores recollidas ao longo do ano. É unha festa que esperta os sentidos: unha explosión de cor, arrecendo e texturas que transforma as rúas nun auténtico espectáculo.
Cada ano, un espectáculo único capta a atención de fotógrafos e fotógrafas de todo o mundo pola súa intensidade visual e forza simbólica. En Sabucedo, A Estrada, celébrase unha tradición que se remonta ao século XVIII: o encontro entre o ser humano e o cabalo para limpar os animais dos parasitos. Sen cordas nin ferramentas, os “aloitadores” enfróntanse corpo a corpo cos cabalos salvaxes, empregando unicamente a súa habilidade e destreza. Estes animais viven en liberdade nos montes durante todo o ano, ata que chega o momento do ancestral rito.
Cada verán, os viquingos regresan a Galicia. A bordo dos seus emblemáticos drakkars, desembarcan xunto ás Torres do Oeste, en Catoira, con ganas de celebrar. O que foi unha temida invasión é hoxe unha festa multitudinaria que atrae a milleiros de persoas dispostas a revivir unha historia con máis de mil anos de antigüidade. Esta representación teatral converteuse nun emblema compartido por moitas comunidades da Europa atlántica que, como Catoira, un día sentiron o eco das incursións viquingas.
Cambados rende cada ano unha homenaxe multitudinaria ao albariño, considerado o príncipe dos viños galegos. O que comezou como unha competición entre adegas locais, coincidindo coa festividade da Virxe da Pastora —patroa desta vila do Salnés—, converteuse nunha das celebracións enolóxicas máis recoñecidas de Galicia. Hoxe en día, a festa reúne a decenas de milleiros de persoas e reflicte o profundo vínculo de Cambados coa cultura do viño, grazas a unha programación diversa que abrangue desde a tradición ata a innovación, baixo o selo de calidade da Denominación de Orixe Rías Baixas.
