10:00
O límite entre As Neves e Arbo conserva un importante patrimonio. Aínda hoxe se poden visitar mámoas, petróglifos e castros. Altamira é un dos xacementos máis importantes desta zona. Nel asentouse un poboado hai máis de 2.000 anos que sobreviviu durante un tempo despois da conquista romana, e ao redor do que xurdiron numerosas lendas.
11:30
Galicia e Portugal son inseparables, pero no século X a relación non era tan fluída, polo que se construíu a fortaleza de Salvaterra de Miño coa finalidade de defender a vila dos ataques lusos. No recinto tamén se atopan a Casa do Conde e as covas de Dona Urraca, onde se atopa o Museo da Ciencia do Viño do Condado de Tea. Debes pedir reserva para realizar unha visita guiada con degustación incluída.
13:30
Aconsellámosche facer unha parada na capital do Condado e dar un paseo pola zona vella peonil e o Museo Municipal, situado na antiga fábrica de curtidos da familia Garra. Outra opción inmellorable é trasladarse ata o castro de Troña, que viviu a súa etapa de esplendor cara aos séculos I a. C. e II d. C.
16:00
O castelo de Sobroso está custodiado por un gran parque forestal e unha fermosa senda botánica. Achégate a este privilexiado enclave para coñecer máis sobre a historia de Pontevedra e personaxes históricas como Dona Urraca. A súa privilexiada situación próxima ao río Miño, límite natural co país luso, permitía o control das comunicacións entre o interior e o mar do bispado de Tui.
18:30
Nada mellor que acabar a xornada nun dos templos do termalismo das Rías Baixas: o Balneario de Mondariz. Inaugurado en 1873, é un referente entre as principais vilas termais de Europa e renovou as súas instalacións para ofrecer tratamentos innovadores nun escenario histórico.
