Fiestas en Rías Baixas

Illas atlánticas

Un tesouro natural

As illas atlánticas ofrecen paisaxes incomparables e gardan unha impresionante biodiversidade, tanto en terra coma nos seus fondos. Descubre as praias, os cantís, os faros e as rutas deste territorio insular protexido que atrae visitantes de todo o mundo á provincia de Pontevedra.

O paraíso tócase alí onde As Rías Baixas acariñan o Atlántico. O Parque Nacional Marítimo-Terrestre das Illas Atlánticas de Galicia comprende as illas Cíes, as Ons, Cortegada e Sálvora , as tres primeiras pertencentes á provincia de Pontevedra. Este territorio insular ofrece paradisíacas praias de augas cristalinas e area branca, escarpados cantís e un enclave de enorme riqueza biolóxica. Cando as estrelas iluminan o firmamento as illas convértense nun extraordinario planetario ao aire libre, certificado co selo Starlight.

Illas Cíes

Situadas na entrada da ría de Vigo, as illas de Monteagudo e Faro —unidas ambas as dúas pola impresionante praia de Rodas e por unha ponte de pedra— conforman xunto á próxima San Martiño o fermosísimo arquipélago de Cíes, practicamente virxe e cunha cota máxima de 1.800 visitantes diarios para preservar a súa riqueza natural.

Quen visite as illas atopará praias de finísima area branca e augas cristalinas, ademais de diversas calas que fan deste lugar un enclave de ilusión. Rodas foi considerada como a mellor praia do mundo polo diario británico The Guardian. A pasarela que une as dúas illas permite a quen visita o conxunto sentir baixo os seus pés a ondada que bate contra a cara leste do arquipélago, moito máis escarpada. Entre o areal, que alberga un sistema dunar protexido, e a ponte fórmase a lagoa coñecida como Lagoa dos Nenos. Autorización de acceso.

En Monteagudo distínguense as praias de Area da Cantareira e Figueiras, na que se pode practicar o nudismo; e en Faro, a de Nosa Señora, un areal de augas cristalinas que goza dunha vista privilexiada á illa de San Martiño. Unha práctica moi habitual nas súas augas tamén é o submarinismo, debido á gran riqueza biolóxica do seu fondo mariño.

  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes
  •  
    Illas Cíes

A beleza natural das illas consérvase intacta debido a que ningunha delas está habitada. Con todo, é posible espertarse nesta preciosa paisaxe e contemplar desde alí o amencer, xa que nun dos seus piñeirais hai unha zona de acampada habilitada que conta con todos os servizos necesarios.

Para coñecer a fondo as illas, a mellor forma de facelo é percorrer as súas rutas de sendeirismo. No camiño aparecen escarpados cantís e históricos faros que se converten en excelentes miradoiros con vistas únicas. O faro situado ao norte da illa de Monteagudo, o faro do Peito, ofrece magníficas vistas á ría de Vigo; a Cabo Home, en Cangas; e a unha cova mariña coñecida como Furna de Monteagudo. Moi preto deste vixía do Atlántico atopamos un dos observatorios de aves que hai nas illas.

Máis cara ao sur desta illa atópase o Alto do Príncipe, un lugar máxico con fantásticas vistas no que a erosión deixou pegada nas súas rocas formando unha especie de cazoletas e un trono cunha vista vertixinosa aos cantís e ao mar. Xa na illa de Faro, na zona sur, atopamos o faro da Porta e o de Cíes, a case 180 metros de altura, con impresionantes vistas aos cantís e á illa de San Martiño, á que se pode acceder en barco privado.

As illas contan cunha extraordinaria colonia de aves mariñas, co que resultan ideais tamén para as e os afeccionadas ao birding.

Superficie : 3.091 hectáreas (433 terrestres e 2.658 mariñas)

 

Autorización de acceso

O acceso ao Parque Nacional das Illas Atlánticas é limitado, unha medida que se implantou coa finalidade de preservar e conservar esta magnífica paraxe natural. A autorización de acceso ás illas é gratuíta e para obtela é necesario cubrir un formulario ( https://autorizacionillasatlanticas.xunta.gal/illasr/inicio ). Posteriormente as e os visitantes deberán obter o billete nas navieiras para acceder ás illas en barco.

Como chegar?

É necesario facelo en barco; para iso existen múltiples navieiras que o fan posible desde diversos portos das Rías Baixas. Desde Vigo, Cangas, Baiona e O Grove o barco parte cara ás Cíes. Os portos de Sanxenxo, Portonovo, Bueu e Vilanova de Arousa ofrecen o itinerario cara a Ons .

Navieiras

Mar de Ons

Nabia

Cruceros Rías Baixas

Bahía-Sub

Naturaleza Atlántica

Tours Rías Baixas

Cruceros Illas de Ons

Illas Ons

Fronte á ría de Pontevedra atópase este fermoso arquipélago composto polas illas de Ons, Onza e o illote das Freitosas. Esta paraxe esconde incribles praias, covas mariñas e espectaculares cantís coma o impresionante Buraco do Inferno. Un fermoso faro custodia a illa de Ons, que conta cun pequeno núcleo rural habitado con casas mariñeiras típicas, hórreos e unha pequena igrexa en honra a San Xaquín. Existe a posibilidade de aloxarse nun dos seus establecementos ou na zona de acampada e gozar da gastronomía das Rías Baixas.

Na illa hai cinco grandes praias de gran beleza natural. Na zona norte está o areal nudista de Melide, o máis grande da illa, e a continuación As Dornas . Na praia de Area dos Cans, a máis coñecida e frecuentada polas e polos bañistas, atópase a sepultura antropomorfa da Laxe do Crego, unha roca á que se pode acceder cando baixa a marea. Completan a listaxe as praias de Canexol e Pereiró.

O sendeirismo é un dos principais atractivos deste paraíso insular das Rías Baixas. Ao norte, a punta do Centolo ofrece unhas fermosas vistas á praia da Lanzada e unha impresionante posta de sol sobre Sálvora. A ruta que ascende ata o faro leva a quen a emprende ao punto máis elevado da illa, desde onde as vistas son excepcionais. Ao sur, no miradoiro de Fedorentos, a instantánea enmarca unha fermosa vista a Onza, á entrada da ría de Pontevedra, e ao fondo, a maxestade das Cíes.

Superficie : 2.641 hectáreas (470 terrestres e 2.171 mariñas)

  •  
    Illas Ons
  •  
    Illas Ons
  •  
    Illas Ons
  •  
    Illas Ons
  •  
    Illas Ons

Illa de Cortegada

Un bosque de loureiros en plena ría de Arousa? A illa de Cortegada, separada por apenas 200 metros da costa do Carril (Vilagarcía de Arousa ), alberga o bosque de loureiros de maior superficie de España, unha auténtica xoia da natureza. Neste fermoso enclave insular, especialmente frondoso, conviven árbores centenarias con especies arbóreas autóctonas coma carballos, piñeiros ou salgueiros.

Unha serie de pequenas lagoas, as ruínas dunha antiga ermida e un cruceiro forman parte desta fermosa paraxe, habitada no pasado, creando un ambiente máxico e misterioso. A illa de Cortegada é a maior dun arquipélago que conta con outras illas coma as Malveiras ou as Briñas. Cando baixa a marea emerxe das augas o antigo Camiño do Carro, un carreiro que permite acceder a pé á illa, utilizado noutros tempos para transportar cargas.

Superficie: 191 hectáreas (43,8 terrestres e 147,2 mariñas)

  •  
    Illa de Cortegada
  •  
    Illa de Cortegada
  •  
    Illa de Cortegada