Carrusel de festas sen fin
As grandes e pequenas festas da provincia de Pontevedra conservan intactas as tradicións máis arraigadas nesta terra, reviven grandes episodios históricos e renden culto aos mellores produtos culinarios das Rías Baixas.
Históricas, épicas, artísticas, gastronómicas… Estas grandes celebracións populares representan un dos trazos de identidade desta terra, máis de medio centenar están declaradas de Interese Turístico, sete delas con recoñecemento internacional. Un legado de enorme riqueza que atrae decenas de miles de persoas ano tras ano.
XULLO - DECEMBRO (catálogo en PDF)Non perdas nin unha das 58 festas de interese turístico que teñen lugar nas Rías Baixas ata fin de ano. Preme sobre os mapas para descubrilas e planificar a túa visita.
A Feira do Cocido, a Romaría Viquinga, a Arribada, a Festa da Lamprea, as alfombras de Ponteareas, a Rapa das Bestas e a Festa do Albariño son as máis afamadas festas da provincia de Pontevedra. A elas únense outras 51 distinguidas a distintos niveis. Gastronomía, tradición, historia e moita diversión únense nestas celebracións multitudinarias.
Campañas pola igualdade e o medio
Diversión, sempre con respecto polo medio ambiente e sen cabida para condutas machistas. A Deputación de Pontevedra e Turismo Rías Baixas instalan nos festivais e nas grandes festas de interese turístico postos con información e outros materiais para concienciar a cidadanía e previr agresións sexuais (as campañas “Lembra, eu decido ti respectas” e “Conta comigo, eu respéctote) e sobre a necesidade de recoller plásticos e outros residuos para protexer o planeta (“Somos sostibles” e “Fame de SOStibilidade”). O lecer e o compromiso coa igualdade e o medio ambiente van da man nas Rías Baixas.
