Miradoiros e grandes paisaxes

O Facho (Cangas do Morrazo)

O ascenso ata o punto máis elevado da Costa da Vela recompensa as e os viaxeiros cunha magnífica vista coas Cíes e Ons no horizonte. O Facho pode presumir dun dos atardeceres máis espectaculares e fotografados das Rías Baixas. Sobe ata os 184 metros de altura e despide o sol á beira dun dos xacementos arqueolóxicos máis relevantes da provincia de Pontevedra.
Monte da Picaraña (Ponteareas)

Desde o alto da Picaraña gozarás dunha panorámica formidable da comarca do Condado e do castelo de Sobroso. A lenda di que no cume, a 387 metros de altura, Pedro Madruga contaba cunha fortaleza que despois derribaron os Reis Católicos. No máis alto resiste a capela da Santa Cruz, edificada en 1907.
Santa Trega (A Guarda)

O miradoiro de Santa Trega proporciona unha imaxe única en Galicia, unha panorámica de 360 graos da fronteira natural entre Galicia e Portugal. A súa altitude de 341 metros permite observar a confluencia das augas do río Miño co océano Atlántico a escasos metros dun dos poboados prerromanos mellor conservados do país.
Faro das Illas Cíes (Vigo)

Unha das vistas máis impresionantes que lles ofrecen as illas Cíes ás e aos seus visitantes é a panorámica sobre a ría de Vigo desde o miradoiro do faro, a 178 metros de altitude. A ruta de 4 quilómetros desde a praia de Rodas permite coroar o cume en algo máis de hora e media. O tramo final en zigzag é un dos puntos máis escarpados e recoñecibles do litoral galego.
A Siradella (O Grove)

É o punto máis elevado da península do Grove e a mellor alternativa para contemplar a ría de Arousa e o océano Atlántico. Brinda ademais unha imaxe completa da enseada do Bao, no istmo da Lanzada, punto de referencia nacional para o avistamento de aves. No cume atopamos un Centro de Interpretación da Natureza e unha zona de lecer infantil.
O Castro (Vigo)

A peculiar orografía viguesa sitúa en pleno centro urbano o miradoiro do monte do Castro, que brinda unha panorámica completa da ría de Vigo co Morrazo á fronte e as Cíes no horizonte. Hai que cruzar os muros da antiga fortaleza para acceder a este espectacular enclave que sobrevoa o porto pesqueiro e a torre do Concello. Está a 149 metros sobre o nivel do mar.
O Cruceiriño (Crecente)

Desde este miradoiro e o do Alto de Guillade obsérvanse con facilidade o val e os meandros do río Miño, que xusto neste punto realizan un xiro de case 360 graos. Desde a cima aprécianse as pontes entre Filgueira e Cortegada e vese a localidade de Crecente. No outono as cores ocres do abundante arboredo crean unha atmosfera case mística.
O Con do Forno (A Illa de Arousa)

Desde o montículo coñecido como O Con do Forno divísase unha espectacular panorámica sobre o centro urbano da Illa e boa parte da ría de Arousa. Converteuse nun dos puntos máis concorridos do litoral da provincia no verán e acolle unha figura en pedra do Corazón de Xesús “O Santo” desde 1962. O ascenso é agradable cunha camiñada de 20 minutos desde o centro.
Monte Aloia (Tui)

A impresionante beleza desta atalaia a case 630 metros de altura deixará unha pegada indeleble na túa memoria. Proporciona unha espectacular imaxe dos vales dos ríos Miño e Louro. O seu punto máis elevado sitúase no alto de San Xiao, que conta cunha pequena ermida de 1713 construída sobre un templo románico.
A Peneda (Soutomaior)

Este montículo piramidal ofrece unhas vistas espectaculares da ría de Vigo, con Rande e a illa de San Simón como protagonistas. Ascende ata unha paraxe máxica. A lenda fala dun túnel subterráneo que conectaba este monte a 329 metros de altura co castelo de Soutomaior. Esta ruta secreta serviría na Guerra de Independencia para enviar reforzos na loita contra os franceses.
Lobeira (Vilanova de Arousa)

Este estratéxico enclave natural é un deleite para os sentidos ao brindar unha excepcional instantánea da ría de Arousa ao completo, incluíndo a costa e o interior. Perfecto para chegar en bicicleta, outra opción é ir en coche e facer o último tramo a pé. A subida ata os case 300 metros verase recompensada cun fabuloso atardecer.
Fervenza do Toxa (Silleda)

No corazón de Silleda atopámonos cunha caída de auga de preto de 30 metros de altura que causa unha profunda impresión vista desde o alto do miradoiro do Toxa. Este enclave rodeado de densos bosques de carballos, castiñeiros e sobreiras é un balcón natural colgado sobre unha das fervenzas máis belas de Galicia.
Miradoiro Campo da Rata (Redondela)

Goza dunha das mellores vistas panorámicas de Galicia desde o monte de Trasmañó, en Redondela. Está situado a máis de 250 metros de altitude sobre o nivel do mar, pero se pode alcanzar facilmente ao poder acceder no coche ata os pés do outeiro. Na cima hai un banco coa inscrición “Galiza. It’s different”, que converteu este enclave en viral. Saborea un atardecer sobre a ría de Vigo con vistas ás Cíes ou á illa de San Simón.
Miradoiro das Antenas en Domaio (Moaña)

A parroquia de Domaio, en Moaña, estreou hai pouco un dos miradoiros panorámicos máis impresionantes das Rías Baixas, situado a 600 metros de altura. Cando está despexado, é posible ver as tres rías da provincia de Pontevedra. É un lugar de fácil acceso para visitar en familia e gozar dun contorno único, no que se atopa o dolmen de Chan da Arquiña.
Couto das Forcadas (A Canicouva, Pontevedra)

O novo miradoiro do Couto das Forcadas está situado no parque forestal da Fracha, na Canicouva, e goza dunhas vistas privilexiadas das rías de Pontevedra e de Vigo. Tamén se acondicionaron sendas peonís e ciclistas nesta zona de recreo do municipio de Pontevedra, que se converteu nunha especie de “balcón” ás rías.
Miradoiro de Cabo Silleiro (Baiona)

A moi poucos metros do faro de cabo Silleiro, subindo desde a estrada que une Baiona coa Guarda cara ao antigo cuartel militar, atopámonos cun miradoiro de madeira construído sobre un conxunto de grandes rochas e cunhas espectaculares vistas. Desde a plataforma, situada a uns 100 metros de altitude sobre o nivel do mar, pódense ver as illas Cíes, Monteferro, a península de Monterreal —onde se sitúa o parador de Baiona— e, en días despexados, a Costa da Vela e a ría de Arousa

No cumio das Rías Baixas

O ondulante trazado das tres rías e a exuberante natureza do interior de Pontevedra converten calquera percorrido pola provincia nun auténtico espectáculo para os sentidos. Ademais de gozar sobre o terreo desta riqueza paisaxística e patrimonial podes admirala en conxunto desde unha das impresionantes atalaias que salpican As Rías Baixas.

Ascende a unha destas cimas, divisa desde as alturas esta terra de contrastes e goza das súas espectaculares vistas sobre os meandros do río Miño, a serra do Cando, as illas de Tambo ou San Simón ou os centros urbanos de Vigo e Vilanova de Arousa. Non o esquecerás!