10:00
Coñeces a famosa batalla de Rande e a lenda sobre o tesouro somerxido na ría de Vigo? O Centro de Interpretación de Meirande ofréceche a oportunidade de saber máis sobre a historia de Vigo. A súa misión é sensibilizar e concienciar sobre a enorme riqueza artística, sociocultural e paisaxística da ría.
12:30
Ascende ata o Campo da Rata en Redondela e saborea con tranquilidade unha panorámica completa da ría de Vigo desde un excepcional banco de madeira. A recompensa é inmellorable, con vistas ás illas Cíes á fronte, a ponte de Rande e a península do Morrazo diante e, cara ao interior da ría, a preciosa illa de San Simón, que pode visitarse baixo reserva. Imposible pedir máis.
Seguimos na enseada de San Simón, onde cría o choco, tamén coñecido como sepia” ou “xiba”. En Redondela danse tres factores que fan que este sexa o seu prato estrela: un hábitat inigualable, as técnicas de pesca artesanal e as preparacións tradicionais. Vas quedar sen probalo?
16:00
Despois do xantar, nada mellor que un paseo á sombra xunto ao río Louro. Propoñémosche un agradable paseo por unha senda fluvial de 3 quilómetros de longo á que se pode acceder desde O Porriño ou polo lado de Mos. É un enclave perfecto para descansar e recuperar forzas cando a calor aperta.
19:00
Para finalizar a xornada descubre un centro urbano aberto, peonil e ben conservado. Construcións históricas, casas burguesas e comercios en soportais. Todo iso coa firma do arquitecto Antonio Palacios, que deseñou o concello, a fonte do Cristo e a Botica Nova. Arquitectura histórica, fachadas orixinais e ambiente agradable para gozar das últimas horas do día.
