Escapada - Interior norte - Detalle escapada - Turismo Rias Baixas

Empeza o teu día na Estrada cun fantástico paseo polo pazo de Oca, tamén coñecido como o versalles galego. Os seus xardíns son todo un paraíso botánico no que florecen as camelias durante a estación fría e onde conviven outras especies nun contorno rodeado por carballos, tileiros, castiñeiros, nogueiras e bidueiros. Os seus estanques simbolizan a virtude e a vaidade.

A próxima parada levarate a Vila de Cruces; á beira do río Ulla poderás visitar a igrexa do antigo mosteiro de San Salvador de Camanzo. O templo é a única construción que se conserva, ademais dalgúns restos da sala capitular do cenobio, que foi fundado na primeira metade do século X polos condes de Deza, Gonzalo de Betote e a súa muller, dona Tareixa.

Para continuar o teu itinerario, que mellor forma de repoñer forzas que gozar da gastronomía da provincia de Pontevedra. Para comezar podes visitar unha adega coma a de Castro Brey e catar un delicioso viño da D. O. Rías Baixas, para despois degustar un exquisito prato de galo de curral nun dos establecementos da localidade.

Pola tarde un sendeiro máxico espéranos en Silleda. O camiño comeza e remata no mosteiro de San Lourenzo de Carboeiro, unha xoia do románico inmersa na natureza. A ruta, de 15 quilómetros e dunha duración aproximada de 3 horas e media, levaranos por frondosos bosques, ríos, aldeas e a espectacular fervenza do Toxa, o maior salto de auga de Galicia.

Hora de levantarse! A Fraga de Catasós espéranos en Lalín. Comeza a xornada cun pequeno percorrido por este bosque autóctono declarado Monumento Natural. Esta paraxe esconde carballos e castaños centenarios que parecen rozar o ceo, con ata 30 metros de altura, os máis altos de Europa. Un sitio idílico perfecto para respirar aire puro.

No centro de Lalín chama a atención o edificio do concello, obra dos arquitectos Tuñón e Mansilla, un dos exemplos máis importantes da arquitectura contemporánea das Rías Baixas. E se o seu exterior sorprende, aínda o fará máis o seu interior: un museo dedicado aos restos arqueolóxicos castrexos da comarca ábrenos as portas a esta cultura, ás súas lendas e á súa gastronomía.

Sen movernos de Lalín podemos contemplar unha das coleccións etnográficas máis completas de Galicia na Casa do Patrón. Alí descubriremos antigas escolas, hábitos de vida e oficios tradicionais, e mesmo unha taberna tradicional de aldea. O seu restaurante ofrece pratos típicos elaborados con produtos de primeira calidade da horta e da gandería da zona.

Despois de repoñer forzas cunha deliciosa comida achegarémonos ao pazo de Liñares, onde podemos admirar a súa arquitectura e a súa gran balconada. Neste pazo barroco do século XVII pasou longas tempadas a escritora galega Emilia Pardo Bazán. O seu interior alberga o Museo Galego da Marioneta, no que se poden apreciar máis de 300 pezas do mundo dos monicreques.

Para poñer o ramo á xornada dirixirémonos ás Brañas de Xestoso, unha zona húmida de turbeiras de media montaña, ideal para realizar unha ruta de sendeirismo, localizada entre os municipios da Estrada e Silleda. Neste enclave natural hai unha lagoa estacional, a lagoa Sacra de Olives, que se suma ao atractivo deste hábitat perfecto para observar aves.