Como moverme en taxi
Taxi
Radiotaxi
- Pontevedra Cidade: 986 86 85 85
- Vigo: 986 470 033
- Vilagarcía de Arousa: 986 511 511
- Sanxenxo: 986 720 160
Mondariz-Balneario é o municipio máis pequeno de Galicia e un dos recunchos máis especiais das Rías Baixas. O balneario desta vila termal, galardoado en múltiples ocasións como o mellor de España, empezou a cimentar a súa fama a finais do século XIX, época dourada dos baños en toda Europa, e a pegada do seu esplendor aínda pervive.
Este centro termal, con máis dun século de historia, mima as persoas que o visitan coas súas excelentes augas termais aplicando as técnicas máis modernas e tratamentos de saúde, beleza ou benestar. Con máis de 3.000 m2 dedicados ao relax e ao lecer, o Palacio da auga é un gran spa para gozar en solitario, en parella, en grupo ou con nenas e nenos, que, ademais, poderán gozar dunha área infantil cun completo programa de animación.
Entre o conxunto de edificios do balneario destaca a construción histórica do Gran Hotel, obra do gran arquitecto Jenaro de la Fuente.
O Palacio da Auga, un dos imprescindibles do balneario, é un spa cunha superficie de máis de 3.000 m²
Os seus fermosos xardíns animan os visitantes para descubrilos á vez que atoparán no camiño as fontes termais de Troncoso, ás que se accede por un paseo ao longo do río Tea; e a da Gándara, cun pavillón de granito anexo obra do arquitecto Antonio Palacios.
Non perdas de ver ...
- Antigo Gran Hotel
- O Palacio da auga
- Fonte da Gándara
- Fonte de Troncoso
O esplendor de Mondariz
O balneario viviu a súa particular “Belle Époque”, recibindo a visita de personaxes ilustres e selectos da cultura, do pensamento e da política da época, coma Castelao, a raíña Isabel de Portugal ou Emilia Pardo Bazán, nun ambiente repleto de encanto, de confort e de luxo. A Guerra Civil paralizou a vida do lugar e un incendio en 1973 terminou unha época dourada, hoxe totalmente recuperada e adaptada ao novo século.
O Balneario de Mondariz completa a súa oferta lúdica cunha proposta feita a medida para amantes do golf. Un atractivo campo con 18 foxos que ofrece un ameno percorrido integrado nun fermoso contorno natural. A historia do termalismo en Mondariz ten entre os seus protagonistas a Domingo Blanco, médico natural da vila, que redescubriu no século XIX o manancial de Troncoso e comezou a utilizar as súas augas con fins terapéuticos.
Estas propiedades chegaron a oídos do médico Enrique Peinador, quen, coa finalidade de comprar un balneario, percorreu os mananciais da provincia. Co descubrimento da fonte da Gándara, en 1872, arrinca a singradura do Balneario de Mondariz da man de Enrique e do seu irmán Ramón.
A variedade de especies e a beleza das paisaxes nos que aniñan fan das Rías Baixas un enclave privilexiado para o avistamento de aves. Se che gusta a ornitoloxía toma boa nota porque existe un bo puñado de alternativas para gozar delas no seu hábitat natural.
Cíes acubilla a maior colonia de gaivota patiamarela do mundo e conta con abundantes poboacións de corvo mariño moñudo
Arrinca a túa ruta polo Complexo Intermareal Umia-O Grove, unha Zona de Especial Interese Comunitario que nos últimos anos se consolidou como referencia a nivel nacional para divisar aves acuáticas invernantes ao acoller ao redor de 18.000 exemplares.
para non perder ...
- Complexo Intermareal Umia-O Grove
- Esteiro do Miño
- Brañas de Xestoso
- Miradoiro do monte Faro nas Cíes
O Parque das Illas Atlánticas é outra zona sobresaliente para as e os amantes do birding, validada polos principais distintivos do sector do turismo ornitolóxico. Cíes acubilla a maior colonia de gaivota patiamarela do mundo e serve de refuxio a abundantes poboacións de corvos mariños cristados, mascatos, pombos torcaces e rulas.
Ao sur da provincia de Pontevedra hai que facer unha parada obligatoria no esteiro do Miño, que ofrece unhas condicións idóneas para as aves migratorias e limícolas coma os mazaricos, os biluricos, os pilros ou as avefrías. Con algo de sorte tamén poderás avistar garzas, mergullóns, pentumeiros e mesmo aves rapaces coma a gatafornela, o lagarteiro cincento ou a aguia pescadora.
Illas Atlánticas, un contorno único
O Parque das Illas Atlánticas é unha referencia internacional para a observación de aves. A súa combinación de marismas, praias e cantís perfectos para a cría converten as súas illas nun refuxio para ducias de especies únicas. A súa riqueza natural e a súa fauna avícola atraen cada ano miles de visitantes. No arquipélago hai máis dunha vintena de especies identificadas e rexistradas, 1.100 parellas de corvos mariños e máis de 15.000 de gaivota patiamariela, que predomina en Cíes e Sálvora.
As e os afeccionados á ornitoloxía coñecerán a fondo a provincia no seu traslado ata as Brañas de Xestoso, localizadas no contorno da serra do Candán, pois nas inmediacións da lagoa Sacra de Olives pódense ver multitude de especies protexidas. Escribentas amarelas e riscadas, lavercas, tordos charlos, trigueiróns ou especies migratorias procedentes de África danse cita neste espléndido lugar.
A listaxe de zonas húmidas e marismas para avistamento é moi ampla nas Rías Baixas e inclúe as Gándaras de Budiño (Porriño), as marismas de Alba na ribeira do Lérez (Pontevedra), o Centro de Interpretación do Monte Aloia (Tui), a zona húmida da Ramallosa ou Cotorredondo , que acolle un centro de recuperación de aves.
Rabiosa, raída, marafouza, freixerana ou pementa son algunhas das variedades autóctonas de mazá coas que se elabora a sidra da Estrada. A antiga industria local rexurdiu con forza nesta comarca do norte da provincia de Pontevedra. Xa son máis de cen as hectáreas destinadas á plantación de árbores para a elaboración deste auténtico ouro líquido tras un intenso labor das produtoras e produtores locais para revitalizar esta actividade tradicional entre os verdes vales e sedosas ribeiras dos ríos Ulla, Umia e Liñares.
non perdas de ver...
- Ribeiras do Ulla, Umia e Liñares
- Feira da Sidra
- Pazo de Oca
- Brañas de Xestoso
A floración chega entre abril e maio, coincidindo coa saída ao mercado da última colleita. Os espléndidos campos de Tabeirós-Terra de Montes son unha invitación para percorrer o interior da provincia de Pontevedra con todos os sentidos alerta.
Aromática, lixeira, suave en acidez e con corpo; a sidra da Estrada conserva a esencia do pasado, a súa nobreza e autenticidade
A chegada da primavera é o mellor momento para empaparse dos aromas do medio centenar de variedades doces, acedas e amargas desta froita e mergullarse nunha tradición milenaria. O sabor da sidra é lixeiro, aromático e suave en acidez, con corpo. Un luxo para o padal que pode acompañarse dos deliciosos produtos da gastronomía local.
A mazá da Estrada conta co selo de calidade da agricultura ecolóxica e ademais conserva a esencia do pasado, a súa nobreza e autenticidade. Para comprobalo a mellor ocasión é a Feira da Sidra , evento que naceu en 2012 para premiar a quen recuperou esta tradición ancestral con fondas raíces na provincia de Pontevedra.
A visita á comarca complétase cunha viaxe no tempo a través do “versalles galego”, os xardíns do espectacular pazo de Oca , ou cun percorrido polas fervenzas do río Curantes, as Brañas de Xestoso e a Lagoa Sacra de Olives . A comarca de Tabeirós-Terra de Montes alberga impresionantes paraxes naturais para desconectar e degustar produtos de primeira calidade.
Lagares con historia
A fabricación entrou en declive hai máis de cen anos, pero en moitas casas da comarca de Tabeirós-Terra de Montes aínda se conservan antigos lagares para prensar a mazá, e xa a finais do século pasado emprendeuse un proceso de recuperación de plantacións. Son auténticas xoias etnográficas, testemuñas mudas do traballo de outrora con máis de 100 anos de antigüidade. Hoxe pódense visitar as instalacións de Lagar de Ribela e de Sidrería Peroja.
