Atlantic Fest aposta polas paisaxes máxicas da Illa de Arousa e a súa cultura mariñeira para promocionar o festival
A Coral Municipal da Illa entoa a "Gitana, si me quisieras", frase inicial da canción Espíritu olímpico de Los Planetas, mentres se suceden as imaxes, en terra e desde o alto, das espectaculares paisaxes da illa que acollerá o Atlantic Fest o 30 de xuño, 1 e 2 de xullo. Os seus promotores apostaron pola maxia natural deste paraíso arousán, a cultura mariñeira e as veciñas e veciños do municipio, no vídeo de promoción do evento, que abre o pano dos Festivais Rías Baixas .
Coa melodía da coral como banda sonora, o orixinal vídeo mostra de maneira sinxela e a través de espectaculares vistas dos seus espazos naturais e da vila mariñeira a esencia da Illa. A Coral canta xunto ao mar e co belo faro de Punta Cabalo como pano de fondo versionando ao grupo granadino, referente do indie español da década dos 90, que este ano encabeza o cartel de Atlantic Fest.
Carreirón, O Bao, a lonxa, a frota pesqueira e outras belas imaxes altérnanse coa interpretación musical, no faro de Punta Cabalo
A praia de O Bao, onde se instalará o escenario principal; o parque de Carreirón; a lonxa; a frota pesqueira… Ao longo de máis de cinco minutos o vídeo alterna imaxes de paisaxes e da vila coa interpretación da Coral Municipal, ademais de anunciar o gran cartel deste ano: Los Planetas, Lori Meyers, Delorean, The Temper Trap, Rosalía & Raül Refree, Annie B Sweet, Joe Crepúsculo, Os Amigos dos Músicos, Maxïmo Park, L.A., Apartamentos Acapulco, Electric Feels, Sen Senra, Puma Pumku, Dois, Komodo, e Audionave, estes dous últimos gañadores do concurso de bandas emerxentes
Outros atractivos de Atlantic Fest que se presentan no vídeo son a Zona Gastro, as actividades náuticas e infantís e o mercado Galician Tunes.