Unha viaxe en ilustracións polas Rías Baixas
As Rías Baixas serviron de inspiración a representantes de todas as artes ao longo da historia ata hoxe. A mostra "Ilustrando nas Rías Baixas", que se expón na sede da Deputación en Vigo ata o 19 de agosto, reúne obras se sete ilustradoras e ilustradores contemporáneos que expresaron sobre o caderno ou na pantalla a súa visión sobre distintos lugares, xentes e actividades na provincia de Pontevedra. Clara Cerviño, Kiko Dasilva, Lara Lars, Andrea Jano, Eduardo Baamonde, Carlos Castro e Nuvi e Éxfico capturan instantes con distintos estilos e técnicas, mostrando tamén o talento dos e das ilustradoras da provincia e outros lugares de Galicia.
Acuarela, urban sketcher, tinta chinesa ou acrílico... A exposición abarca un amplo abanico artístico. A maioría dos lugares son recoñecibles a primeira ollada, como as prazas de O Berbés (Vigo) e Fefiñáns (Cambados), a ponte da Toxa (O Grove), os faros que salpican a costa ou a ponte de Rande. Noutros casos os e as artistas debuxan escenas poéticas ou integran elementos reais en espazos imaxinarios, creando novos mundos. Tamén se retratan actividades como a pesca e reivindícase a forza das mulleres en distintos escenarios.
Aquí ofrecémosvos unha mostra do que podedes ver na exposición "Ilustrando nas Rías Baixas", aínda que o ideal é achegarse e gozar tamén das experiencias que ofrece Vigo. A sede da Deputación está situada na rúa Eduardo Chao e o horario de visita da mostra é de 10.00 a 20.00 horas nos meses de xuño e xullo, e de 10.00 a 14.00 horas en agosto.
