Los Planetas, segunda incorporación ao cartel do Festival Atlantic Fest
O Atlantic Fest, un dos festivais impulsados por Turismo Rías Baixas, confirmou un novo nome no seu cartel. Trátase do grupo Los Planetas, que figura entre os máis recoñecidos do panorama musical indie a nivel nacional.
O colectivo súmase así a The Temper Trap, o primeiro grupo confirmado para o Atlantic Fest, que se desenvolverá do 30 de xuño ao 2 de xullo na Illa de Arousa. En concreto, o grupo granadino estará na provincia o día 1 de xullo. A súa actuación chega tras outras realizadas en Galicia, sempre con éxito.
Coa previsión de lanzar ao mercado o seu próximo traballo no mes de marzo, Los Planetas obsequiaron xa os seus seguidores cun adianto do novo álbum. O proxecto Espíritu olímpico verá a luz despois de ser gravado nos estudios Refugio Antiaéreo, coa colaboración de Ana Fernández (La Bien Querida) en voces e coros e de Loreak Mendian aos mandos do deseño gráfico.
Coas entradas xa á venda, aínda é posible facerse cos abonos do festival (43 euros) en www.atlanticfest.com. En relación á venda de entradas nos despachos de billetes, estas estarán dispoñibles no escenario Son Estrella Galicia, na praia do Bao, os días 30 de xuño e 1 de xullo, así como no auditorio Turismo Rías Baixas o día 30 de xuño.
