Actores de primeiro nivel, os novos embaixadores das Rías Baixas nas redes sociais
As costas galegas atraen a novos embaixadores con motivo das series que se están rodando nestas rías atlánticas. Por unha banda, Produciones Bambú, encabezada pola pontevedresa Teresa Fernández Valdés considerada recentemente pola revista Forbes como unha das mulleres máis influentes de España, arrinca coa gravación de Fariña, unha adaptación do aclamado libro de Nacho Carretero de 2016 sobre o que supuxo o narcotráfico na comunidade, aparición e auxe do mesmo. Todo baixo un elenco maioritariamente galego e liderado por Javier Rey, no que non faltarán actores da talla de Tristán Ulloa.
Pola outra parte, comeza tamén a rodaxe da serie Vivir sin permiso, con dous actores excepcionais como José Coronado e Álex González, que nestes días mostraron nas redes sociais a agradable acollida das rías de Pontevedra tanto polo seu clima como pola súa beleza.
"En oeste nunca se pone el sol..." mencionaba Coronado en Instragram e Twitter baixo unha magnífica posta de sol con todo o set de rodaxe na mesma praia. Mentres tanto, Álex González facía o mesmo para os seus 800.000 fans en Instagram, esta vez cun vídeo que xa alcanza case as 100.000 reproducións no que mostraba o seu bo humor e onde se distingue que está a cruzar A Illa de Arousa baixo unha bonita panorámica.
Non en balde, A Ría de Arousa vai ser un dos enclaves de ambas as series, especialmente polo seu pasado histórico co narcotráfico, pero que ademais agora, ten a posibilidade de mostrar ao mundo a gran beleza que esconde a expensas dese turbio pasado.
Ambas as gravacións comezaron en xuño. A rodaxe de Fariña espérase que dure 6 meses, e de Vivir sin permiso sabemos que só será unha tempada, no que o post-narcotráfico, a familia e o alzhéimer do personaxe de Coronado, cabeza do clan, xogan un papel esencial, ademais espérase a súa estrea para a próxima tempada.
