"Fame de Experiencias" pecha o seu paso polo circuíto internacional de festivais turísticos con 12 premios e votos desde 41 países
O destino Rías Baixas – Pontevedra Provincia deu en 2020 un gran paso adiante na súa proxección internacional tralo exitoso percorrido de “Fame de Experiencias” polos festivais que compoñen o circuíto do Committee of Tourism Film Festivals (CIFFT), a cita máis prestixiosa do mundo na industria do marketing de vídeos de viaxes.
O vídeo da Deputación de Pontevedra que rende homenaxe as e os productores da provincia, producido por Esmerarte Industrias Creativas, recibiu premios en 11 festivais da rede, unha traxectoria que coroou co título de Mellor Película de Produto Turístico do Mundo no World’s Best Film Award da CIFFT. A este impresionante palmarés súmase un decimoterceiro galardón internacional ao lograr en xaneiro a distinción como Mellor Película de Promoción de Produto Turístico Español no FITUR Travel Film Video 2020, neste caso alleo ao circuito da CIFFT.
Ademais “Fame de Experiencias” obtivo votos desde 41 países na votación popular que convoca a CIFFT para entregar o People’s Choice Award, no que é o público o que elixe as cintas gañadoras. Neste premio o vídeo da Deputación finalizou en cuarta posición co 5,8% dos apoios totais e “Hunger for Experiences” acadou as 28.000 visualizacións na rede social Vimeo, desde a que podía visualizarse para votar.
O Grand Prix da CIFFT constitúe un importante apoio para potenciar a marca dos destinos turísticos que presentan os seus traballos á rede de festivais. O seu impacto alcanza a 250 millóns de persoas de 166 países e os contidos que xera nas webs superan as 325.000 páxinas vistas. “Fame de Experiencias” resultou premiado no Tour Film Fest de Bulgaria, Tourfilm RIGA de Letonia, New York TV&Film Festival (EE UU), Das Goldene Stadttor de Berlín (Alemaña), US international Film & Video Festival de Los Ángeles (EE UU); Silafest en Serbia; Terres Travel Festival de Tortosa (España), Turizm Filmleri Festival de Cappadocia (Turquía); International Tourism Film Festival de Viseu (Portugal), Amorgos Tourism Film Festival (Grecia) e Zagreb Tour Film Festival (Croacia).
Oscar do turismo
O título de Mellor Película do Mundo nos World’s Best Tourism Film Awards, os chamados Premios Oscar do Turismo, entregados este ano nunha gala celebrada desde Viena, supuxo a guinda para o percorrido internacional do vídeo da Deputación de Pontevedra, que competía na final con 32 cintas de 14 países. Con este recoñecemento a provincia de Pontevedra converteuse na única rexión española en obter un primeiro premio neste prestixioso evento.
Homenaxe as produtoras e produtores con grandes chefs
O éxito de “Fame de Experiencias” cumpre un dos grandes retos fixados no Plan Estratéxico de Turismo 2017-2020 da Deputación, a aposta pola internacionalización do destino Rías Baixas – Pontevedra Provincia para captar visitantes todo o ano fronte á tradicional concentración do turismo nos meses de verán. O excelente resultado da película no circuito de festivais afonda ademais na proxección do destino como referente en gastronomía, un dos eixos do Plan.
A cinta da Deputación foi o eixo central da campaña do destino turístico Rías Baixas – Pontevedra Provincia en 2019. Fame de Experiencias é unha emotiva homenaxe a todas as produtoras e produtores da provincia, que co seu esforzo diario coidan e suministran unha materia prima de excelencia que está na base da recoñecida gastronomía da provincia a nivel internacional.
O chef Pepe Solla (unha Estrela Michelín) e Amaranta Rodríguez, xefa de sala e unha das propietarias de Culler de Pau (restaurante con dúas Estrelas Michelín) poñen rostro e voz ao fío conductor da cinta, na que tamén participan outros grandes chefs con estrela como Xavi Olleros (Culler de Pau), Yayo Daporta (do restaurante que leva o seu nome), Rafa Centeno e Inés Abril (ambos de Maruja Limón). Os 3’57” da cinta mostran de preto o traballo das persoas dos distintos sectores que cada día extraen os mellores produtos do mar e a terra na provincia.
