Festivais cinematográficos das Rías Baixas: agora, FICBUEU
O calendario cinematográfico das Rías Baixas ten estos días una nova cita imprescindible, o Festival Internacional de Curtametraxes de Bueu (FICBUEU), que fomenta desde 2008 a cultura cinematográfica en formato curta. O evento cultural, que este ano se desenvolverá entre o 9 e o 17 de setembro nesta localidade do Morrazo, abre unha xanela ao cinema local e internacional de calidade con decenas de proxeccións. Ademais, o FICBUEU colabora con centros educativos e conta cunha área social con obradoiros e proxeccións para menores hospitalizados, persoas maiores e persoas con discapacidade intelectual.
O decano dos festivais de cinema de Galicia é o Curtas Film Fest, que se iniciou en Vilagarcía de Arousa en 1973. Alí proxéctanse curtas e longametraxes, acode convidada moita xente do mundo do cinema e a televisión e realízanse actividades paralelas, como as xornadas de cómic, exposicións, sesións de firmas, concursos de videoxogos e xogos de rol. Este ano celébrase do 25 de outubro ao 3 de novembro.
Pontevedra inaugurou en 2016 outra mostra de calidade, o Festival Internacional Novos Cinemas, que este ano terá lugar entre o 10 e o 15 de decembro. O certame está aberto a cineastas emerxentes de todo o mundo e premia o traballo das directoras e directores noveis. Durante o festival realízanse encontros do público con cineastas e equipos de producións que se presentan na sección oficial.
O Play-Doc de Tui é a cita de referencia en cinema documental nas Rías Baixas. O certame, que en 2020 se realizará entre o 29 de abril e o 3 de maio, destaca pola gran calidade da súa programación, enriquecida na nova edición cunha colaboración especial da sala Metrograph, icona do cinema independente neoiorquino. O Play-Doc recibiu máis de 700 traballos procedentes de 66 países este ano e a programación compleméntase con música en directo, cursos, seminarios e obradoiros. Nesta nova convocatoria ofrecerán concertos Joan as Police Woman & Benjamin Lazar Davis, Star Rover e The Dirty Coal Train.
O "agroglamour" galego
Fronte ao luxo e a sofisticación de Cannes, que reúne as grandes estrelas do cinema mundial, a parroquia de Cans, no Porriño, presume do agroglamur do seu afamado festival de curtas de produción galega, que combina o cinema coa diversión e a autenticidade. As e os artistas desfilan en chimpín pola estrada central, que durante o evento se transforma no Cans Bulevar; O Torreiro ―a praza da igrexa― é o centro da festa; e as proxeccións realízanse en adegas, galpóns, baixos e casas vellas. Festivais cinematográficos hai moitos, pero ningún se asemella en estilo, concepto e orixinalidade ao de Cans, no que as e os novos cineastas atopan o escenario ideal para difundir o seu traballo e ao que recoñecidos actores e directores non poden resistirse.
Luis Tosar, Juanma Bajo Ulloa, José Luis Cuerda, Karra Elejalde, Daniel Guzmán, Javier Gutiérrez… Son moitos os cineastas que desfilaron pola "pasarela" de Cans, que segundo a propia organización "quizais non sexa o mellor festival, pero si o máis diferente". O evento, ao que concorren curtas de ficción, non ficción, animación, videoclips e web series, ten lugar a terceira fin de semana de maio, coincidindo co glamuroso certame da Costa Azul francesa.
As Rías Baixas ofrecen sesión cinematográfica continua cunha ampla panorámica. A sétima arte cóidase, difúndese e prémiase, en curto e longo formato.
