As Rías Baixas seducen visitantes de todo o mundo co bus turístico en Madrid
As Rías Baixas seducen visitantes de todo o mundo co bus turístico que percorre Madrid estes días. O centro neurálxico da capital é escenario do percorrido de promoción do vehículo, de dous pisos, co que a Deputación de Pontevedra promove a provincia. Esta ruta, que finaliza o martes, percorre as principais localizacións da cidade madrileña, entre as que destacan a Porta de Alcalá, a concorrida Gran Vía, as inmediacións do parque do Retiro, a zona de Callao ou as proximidades do estadio Santiago Bernabéu, enclaves moi transitados e de gran visibilidade.
Deste xeito, ademais das accións levadas a cabo no propio recinto de FITUR, a experiencia de visitar As Rías Baixas dá o salto ás rúas da capital. Faino en franxas do día de alto interese e logrando un elevado impacto de público entre viandantes, turistas nacionais e internacionais, operadores turísticos e os propios condutores.
Cabe sinalar que, tal e como destacou a presidenta do organismo provincial, Carmela Silva, "esta actuación de promoción se basea no aproveitamento das sinerxías que se xeran na capital de España neste momento, no momento da celebración de FITUR, posto que miles de persoas procedentes de todo o mundo se dan cita en Madrid". Neste contexto, Silva manifestou, ademais, que así se logra "conseguir máis presenza, ir máis aló da presentación de destino realizada e estar nas rúas de Madrid, para que todas e todos poidan ver a beleza das Rías Baixas".
