Cabo Home, o Cruceiro do Hío, Massó… cinco grandes rutas guiadas para coñecer Cangas en setembro
Cangas atesoura fermosas paisaxes, natureza, un interesante pasado industrial do que a antiga fábrica de Massó é o máximo vestixio, e unha apaixonante historia. Para penetrarse en todo este rico patrimonio o Concello, da man da Asociación Illa dos Ratos, organiza unha serie de rutas guiadas das que xa gozaron centos de persoas, e que continuará nas próximas semanas con máis excursións.
Coa chegada de setembro arrinca a nova quenda de camiñadas todos os sábados pola mañá cunha duración media de entre 90 minutos e tres horas. Apresurádevos porque as prazas son limitadas. Podedes inscribirvos na Oficina de Turismo de Cangas (teléfono 986 392 023); enviando un correo electrónico á dirección ailladosratos@gmail.com; ou mediante o Facebook da citada asociación.
Aquí deixámosvos un resumo de cada ruta.
Massó "Ou sentir dun pobo" (2 de setembro)
O complexo industrial de Massó , coa que foi no seu día a conserveira máis grande de Europa á cabeza, constituíu un fito no Morrazo e en Galicia. Avances tecnolóxicos, actividade baleeira, a orixe da gardería, o declive da industria, a súa influencia económica e simbólica en Cangas … A través do relato da historia, curiosidades e anécdotas as persoas participantes na ruta poderán coñecer o pasado deste xigante cuxa factoría principal aínda se mantén en pé, agora desmantelada, nun lugar privilexiado da costa.
-Punto de partida: fábrica de Massó
-Duración aproximada: 2 horas
-Lonxitude: 1,4 quilómetros
Cabo Home. "Camiño dos faros" (día 9)
Ademais de dar a coñecer esta espectacular paraxe natural, a excursión guiada ten como obxectivo concienciar sobre o ambiente. As persoas participantes coñecerán os efectos da introdución da flora e fauna alóctonas, o efecto da acción do home ou a evolución natural da paisaxe e a contorna costeira.
-Punto de partida: Caracola de Donón
-Duración aproximada: 1 hora e 45 minutos
-Lonxitude: 3 quilómetros
Intermareal. "Mar á vista" (día 16)
A excursión parte da praia de Areamilla e percorre o Espazo Natural de Punta Balea, unha zona de gran riqueza e biodiversidade. As persoas participantes coñecerán como se forman as ondas, os diferentes tipos de praias e a vida mariña, entre outros interesantes datos contados de forma amena.
-Punto de partida: Areamilla
-Duración aproximada: 1 hora e media
-Lonxitude: 1,2 quilómetros
Hío. "De pedra en pedra " (día 23)
Para moitos o "cruceiro dos cruceiros" eríxese no adro da igrexa de Hío. Alí loce o monumental conxunto escultórico obra do mestre Cerviño, rodeado ademais dunha fabulosa contorna paisaxística. Pedra a pedra, o grupo percorrerá os distintos elementos que acompañan ao cruceiro: o adro de danzas e defuntos, unha igrexa de arte e cultos, casas de señorío, unha fonte de felicidade, un lavadoiro de noticias, e rúas rescatadas do esquecemento.
-Punto de partida: adro da igrexa de Hío
-Duración: 1 hora e media
-Lonxitude: 1 quilómetro
Serra da Madalena. "Panorámica de Cangas" (día 30)
As rías de Vigo, Pontevedra e Aldán poden divisarse desde a Serra da Madalena, que ofrece extraordinarias vistas a boa parte das Rías Baixas. Esta é a ruta de maior lonxitude, nove quilómetros, cunha dificultade media-alta, pero o esforzo merece a pena. As vistas chegan ao Salnés polo norte e á Serra da Groba, Maúxo, Alba, Galiñeiro e Aloia polo sur. Dentro do Morrazo os participantes na camiñada observarán a Costa da Vela e Borrallido, Castiñeiras e a Illa de Tambo, ademais do carballal de Coiro e o cume de Monte Faro.
-Punto de partida: aparcadoiro do Balcón do Rei
-Duración: 3 horas
-Lonxitude: 9 quilómetros
