Combarro, entre os seis pobos máis bonitos de España
En breve alcanzaremos as datas do Nadal, e os nosos pobos, barrios e cidades tinguiranse das populares e acolledoras luces que dotarán de cor as tardes e noites de decembro e principios de xaneiro. Coa idea de iluminar un deses pobos, a famosa firma de bombóns Ferrero Rocher, lanza un concurso onde as e os internautas poderán votar ao seu pobo máis "belo e bo", e a persoa gañadora será galardoada cunha iluminación especial para estas festas.
"Luce tu pueblo" é o nome que leva o concurso, e na edición actual foron seleccionadas ata 6 destas vilas. Entre as seleccionadas, Galicia goza de representación da man da popular parroquia de Combarro en Poio, Pontevedra. Un pobo de identidade mariñeira na mesma ría de Pontevedra caracterizado por unha arquitectura do século XVIII que o converten nun espazo íntimo e acolledor.
Cruceiros, hórreos e casas mariñeiras alíñanse e conviven nas súas calellas empedradas á beira da costa galega formando unha paisaxe única.
Un escenario único na ría que lle ha granxeado grandes eloxios e permitido agora formar parte desta exclusiva lista na que compite para alzarse como primeira opción. Os outros cinco pobos cos que comparte a honra son Ezcaray da Rioxa, Grazalema de Andalucía, Guadalupe de Estremadura, Sos del Rey Católico de Aragón, e Vilafamés da Comunidade Valenciana.
Combarro é presentado como "un pobo galego que convive co aroma do sal, o frescor da auga, o son das ondas"
Na mesma páxina podes ver os diferentes vídeos que presentan a cada un dos pobos participantes e que se emitiron na canle de Divinity. A Combarro dáselle publicidade nas redes sociais como "o candidato máis mariñeiro", "un pobo galego que convive co aroma do sal, o frescor da auga, o son das ondas". Continúan a súa descrición no perfil do concurso encomiando non só o seu patrimonio: "declarado ben de interese cultural como conxunto histórico e como sitio histórico", senón tamén á súa xente "As e os combarreses son xente boa, preocupada pola súa contorna, pola súa cultura, e pola axuda ás persoas máis necesitadas".
Tras unha primeira votación ata o 28 de novembro, dous serán os pobos finalistas aos que se terá que votar nunha segunda rolda, neste caso ata o 10 de decembro. Todas as persoas que desexen participar e votar a algún destes pobos pódeno facer a través da seguinte ligazón, e participarán no sorteo de 10 pirámides formadas por 96 bombóns para gozar este Nadal. O sorteo realizarase o luns 11 de decembro e as persoas gañadoras publicaranse o día 16.
