Comezan as Rutas do Marisqueo no Carril
As primeiras xornadas das Rutas do Marisqueo organizado pola asociación Amar Carril e en colaboración coa Deputación de Pontevedra, tiveron lugar o sábado 28 e o domingo 29 de abril na mesma parroquia do Carril, Vilagarcía de Arousa.
Aproveitando a marea baixa e coa Illa de Cortegada de fondo, a sesión comezaba ás dez da mañá e consistía en 30 minutos de taller teórico xunto con outros 30 minutos de práctica.
A beira do mar e ataviados con chuvasqueiros, botas de goma e anciños, o grupo de participantes escoitou atentamente as palabras de Rita, unha das socias de Amar Carril que explicou “como hai moitos anos a escaseza de sardiña provocou que xurdise o cultivo de bivalvos para que os habitantes da zona puidesen dispoñer doutros recursos”. A representante de Amar Carril tamén “alertou sobre o perigo dos plásticos no mar, tanto para a nosa saúde como para a supervivencia dos cultivos de bivalvos que sementan nas rías da provincia de Pontevedra”.
Dentro dunha das súas parcelas de cultivo, moitas herdadas xeración tras xeración, o grupo aprendeu as tarefas propias das mariscadoras das Rías Baixas, tales como, o proceso de sementado de ameixas e berberechos ou o proceso de limpeza do manto verde de algas e da capa de barro procedente do río Umia, proceso que se realiza para evitar que os cultivos de bivalvos afóguense e perdan así a campaña de recolección.
A primeira ruta de marisqueo do sábado 28 esgotou as prazas varias semanas atrás
Despois de utilizar os distintos tipos de anciños para a limpeza e extracción, as persoas participantes puideron probar a ‘raña’ ou gaiola coa cal se consegue extraer maior cantidade de ameixas en menos tempo.
Coas ameixas xa depositadas nos cubos, as mariscadoras ensinaron ao grupo para clasificalas por tamaños e por especies como a japónica, que é a máis demandada; a ameixa fina, que é a máis cara no mercado e a ideal para degustar crúa con limón; ou a ameixa de Carril, a máis famosa da ría de Arousa e a máis idónea para elaborar o popular prato de ‘ameixas á mariñeira’, un dos pratos gastronómicos máis típicos das Rías Baixas. Non en balde, é no Carril onde se celebra a Festa da Ameixa desde 1992 e que hoxe goza de ser de Interese Turístico de Galicia.
A pesar da brevidade da xornada, foi tempo suficiente para valorar a dureza da profesión nun traballo que se ha de desempeñar na auga faga sol, frío ou chova e que agora se pretende mostrar con este turismo mariñeiro.
Para as persoas interesadas, ademais da edición deste fin de semana, séguenlle as xornadas do 19 e 20 de maio e cuxa inscrición se pode realizar a través da páxina oficial da Deputación a partir do 7 de maio.
