Corpus Christi de Ponteareas : 160 anos de alfombras florais únicas no mundo
Desde hoxe e ata o vindeiro luns, Ponteareas revive a súa celebración máis popular, a elaboración das alfombras florais que desde fai 160 anos recobren a coñecida localidade das Rías Baixas durante as festas do Corpus Christi. Nesta tradición, única no mundo, a veciñanza do municipio pontevedrés afánase durante semanas para, pétalo a pétalo, confeccionar os vistosos tapices florais que se estenden por preto dun quilómetro do centro urbano.
Nesta ocasión, ademais das alfombras elaboradas polas localidades de Monçao e Orotava, cuxa presenza é tradicional en Ponteareas, tamén haberá unha colaboración co concello italiano de Gerano. Desta maneira, o municipio espera recibir ao longo destas xornadas a miles de persoas visitantes, que se achegan para coñecer este evento, declarado de Interese Turístico Internacional. Tras adquirir esta distinción en 2009, o certame ten agora por diante o reto da consecución da declaración de Ben de Interese Cultural Inmaterial pola Unesco.
Ademais de alfombristas de Monçao e Orotava, este ano estarán neste municipio das Rías Baixas veciñas e veciños da localidade italiana de Gerano.
Desde 1857, a técnica de confección destas alfombras transmitiuse en Ponteareas de xeración en xeración. De feito, son as veciñas e veciños quen se encargan da totalidade das funcións vinculadas ás mesmas, desde o deseño ata a xeración do persoal ou a disposición de flores e vexetais.
Guía de actividades e tramos alfombrados (PDF)
Recursos turísticos
Xunto á celebración do Corpus Christi, Ponteareas presenta outros recursos turísticos destacados. É o caso do Castelo de Sobroso, situado nun promontorio rochoso na ladeira do Monte Landín.
