Cultura Quente arrinca con arte urbana e música un amplo programa que pechará PortAmérica
Cultura Quente ampliou na nova edición o seu programa, con máis música tradicional, expresións artísticas urbanas, e o festival PortAmérica como broche de ouro. Ao longo da primeira quincena sucederanse en distintos escenarios de Caldas de Reis numerosos concertos, exposicións e as actuacións de Kaldarte, a proposta na que artistas plásticos, arquitectos, performers e outros operadores plasman as súas obras nas rúas e que este ano cumpre vinte anos de vida.
As actividades arrincaron o fin de semana con breakdance, beatbox, grafiti e outras disciplinas urbanas dentro do programa Depo RúARTE, da Deputación de Pontevedra. Mañá inaugúrase no auditorio municipal a exposición "Retratos dunha huída", de Brian Sokol, sobre o drama dos refuxiados; e o venres, entre outras actividades abrirase a mostra "Cultura do viño" na praza do Camiño. No mesmo escenario actuará esa noite a L'Rollin Clarinet Band, e a xornada seguinte ao mediodía terá lugar o terceiro encontro de música tradicional galega na praza das Palmeiras e Arcos da Condesa.
O domingo día 9 no anfiteatro da Tafona chegará a quenda do XIII festival de Bandas de Música, e o luns terá lugar no auditorio municipal un curso de iniciación ao clown. Ese día arrinca un dos pratos fortes de Cultura Quente co inicio das instalacións de "20 anos con Kaldarte " e haberá actuacións artísticas no espazo urbano durante toda a semana.
PortAmérica: 32 artistas e 30 chefs
PortAmérica pasou este ano de Nigrán a Caldas de Reis e integrarase na programación de Cultura Quente. O festival, que se celebra na carballeira da vila termal, á beira do río Umia, contará este ano coa participación de 32 artistas e ata 30 chefs. Xoel López, Leiva, Quique González, Porter, Asian Dub Foundation, Ivan Ferreiro, Niños Mutantes, Nikki Hill, Carlos Jean e Ángel Stanich son algúns dos nomes da variada e atractiva proposta musical que se desenvolverá do 13 ao 15 de xullo Polo escenario ShowRocking de PortAmérica pasarán recoñecidos cociñeiros como Pepe Solla, Javier Olleros, Diego Guerreiro, Maca de Castro e Xoán Crujeiras.
