Da Guarda a Carboeiro: a ruta dos "descubridores" de Rías Baixas
Praias, fervenzas, castros, mosteiros, castelos… A ruta da gañadora e do gañador do concurso Descubridores das Rías Baixas, Yamil Doval e Rosa Martínez (Viajo Sola), deixou belas imaxes que todas e todos podedes consultar nas súas redes (e nas de Turismo Rías Baixas).
O premio do certame, organizado polo portal Minube e Turismo Rías Baixas, consistía en escapadas mensuais para retratar a provincia de Pontevedra cun apoio económico mensual de 400 euros para cubrir gastos. Yamil publicou fermosas instantáneas de paraxes de costa e interior. A pegada do pasado no castro de Santa Trega, a impresionante panorámica desde alí cara ao estuario do Miño e a vila mariñeira da Guarda, Cabo Silleiro e as vistas ás Cíes son algunhas das imaxes do seu periplo costeiro, ás que se suman outras como fotografías de Salvaterra de Miño e o castelo de Sobroso.
Lugares máxicos como a fervenza do Toxa, o castro de Santa Trega ou as illas Cíes móstranse nas súas redes sociais
Yamil, un apaixonado da fotografía que xa había resultado gañador do concurso "Vinte Mil Rías Baixas" –organizado por Turismo Rías Baixas hai uns meses tras alcanzar as 20.000 persoas seguidoras na conta oficial de Twitter–, tamén puxo rumbo ao interior, mostrándonos nas súas redes imaxes da fervenza do Toxa (Silleda), a máis alta de Galicia cun salto de auga de 40 metros de altura, e o mosteiro de San Lourenzo de Carboeiro. Ademais, visitou o pazo de Liñares en Lalín e, no seu interior, o interesante Museo Galego da Marioneta.
Rosa Martínez, fundadora do espazo Viajo Sola, no que visibiliza ás mulleres que viaxan en solitario, colgou nas súas redes imaxes da arquitectura de Vigo e outras de temática mariña: a lonxa de Canido, a praia da Madorra, o Museo do Mar de Galicia ou un atardecer en Monteferro. Ademais, puxo rumbo á ría de Pontevedra, onde exalta a gastronomía de Combarro cunha evocadora fotografía.
As persoas gañadoras soben, segundo recollen as bases, 20 recunchos de calidade ao mes que non existisen previamente en Minube, ademais de compartilos nas súas redes. As e os descubridores organizan as escapadas segundo o seu criterio, mentres que Turismo Rías Baixas e Minube ofreceranlles asesoramento para propoñerlles visitas a lugares de gran beleza.
